Երկրորդ արշավը. ի՞նչ կոմպրոմիս է առաջարկվում հոգևոր իշխանությանը

Վերլուծական 1 Նոյեմբեր, 2019 20:00

Վարչապետ Նիկոլ Փաշինյանն այցելել է Մայր Աթոռ Սուրբ Էջմիածին և հանդիպել Գերագույն հոգևոր խորհրդի և եպիսկոպոսաց դասի տարեկան ժողովի մասնակիցների հետ: Այս հանդիպումը ուշագրավ է այն համատեքստում, որ հեղափոխությունից հետո եկեղեցի-պետություն հարաբերություններում լուրջ հակասություններ էին ի հայտ եկել, որոնք, ի դեպ, մինչ օրս էլ չեն հարթվել: Առաջին արշավը, որ կազմակերպվեց ըննդեմ Հայ Առաքելական եկեղեցու՝ Կաթողիկոսի հրաժարականի պահանջով նախաձեռնված շարժումն էր, վեհարանի վրա հարձակումը, որի ժամանակ իրավապահները, մեղմ ասած, անատամ արձագանքեցին: Այդ նույն շրջանում տեղեկություն էր տարածվել, որ Փաշինյանը կաթողիկոսի աթոռը առաջարկել էր Արամ Ա-ին, վերջինս, սակայն, կտրուկ մերժել էր այդ առաջարկը, արդյունքում՝ ՀԱԵ-ի դեմ սկիզբ առած առաջին արշավը դադար վերցրեց:

Եթե առաջին անգամ Վեհարանը գրավելիս, երբ իրավապահ համակարգը իր գործառույթները չիրականացրեց որպես կառույց, Փաշինյանը չէր երեւում, հակառակը՝ հիմնավորում էր, որ եկեղեցին անջատ է պետությունից, այս անգամ ուղղակիորեն ինքը ձեռնոց նետեց, այսինքն` ինքն է առաջնորդում եկեղեցու դեմ երկրորդ արշավը։ Փաշինյանի ԱՄՆ –ում արված կտրուկ հայտարարություններով եւ BBC-ի՝ վարկաբեկիչ հոդվածներով եկեղեցու դեմ գործող մարգինալ խումբը վերակենդանանում է: Ո՞րն է նպատակը: Նպատակը հասկանալի է. եկեղեցու դիրքերի թուլացում, հոգևոր արժեքների երկրորդ պլան մղում: Հասկանալի է, որ սա մի ծրագիր է, որը իրականացվում է ներկայիս իշխանությունների կողմից՝ դրսից թելադրանքով, այսինքն՝ սա նույնպես մտնում է որոշակի պայմանավորվածությունների տիրույթի մեջ. պայմանավորվածություններ, որոնք Փաշինյանը և իր թիմը հանձն է առել կատարել:

Իշխանությունները, ըստ էության, գործարք են առաջարկում՝ եկեղեցին չի խառնվում այդ պլանի իրագործմանը, իսկ իշխանությունները չեն փորձում փորել բարձր հոգևոր դասի ներկայացուցիչների տակը: Այս ողջ ընթացքում, թերևս, մեկ դեպք է գրանցվել, երբ եկեղեցին բացահայտ հակադարձել է իշխանություններին, դա «Ստամբուլյան կոնվենցիա»-ի վավերցումը դատապարտող հայտարարությունն է: Գուցե հենց այս հարցում են իշխանությունները ցանկանում կոմպրոմիսի գնալ հոգևոր իշխանության ներկայացուցիչների հետ…