«Freedom On the Net» զեկույցում Հայաստանը տարածաշրջանում առաջատարն է

Հայաստան 5 Նոյեմբեր, 2019 14:28

«Freedom House» միջազգային իրավապաշտպան կազմակերպությունը հրապարակել է Համացանցի ազատության «Սոցիալական մեդիայի ճգնաժամը» վերտառությամբ զեկույցը, համաձայն որի՝ Հայաստանը դասվում է «ազատ» երկրների շարքին: Դիտարկված 65 երկրների շարքում Հայաստանը այն 3 երկրներից մեկն է, որը 2019թ. գրանցել է ամենամեծ առաջընթացը:

Ֆրանսիան և Հայաստանը, ստանալով հավասարապես 76 միավոր, կիսում են 8-րդ հորիզոնականը: Համեմատության համար նշենք, որ 2018 թվականի զեկույցի համաձայն Հայաստանը համացանցի ազատության ցուցիչով զբաղեցնում էր 13-րդ հորիզոնականը:

Զեկույցում մասնավորապես նշվում է. «Հայաստանում դրական փոփոխությունները, որոնք սկսվել են 2018թ. Թավշյա հեղափոխությամբ, շարունակվում են ռեֆորմիստ վարչապետ Նիկոլ Փաշինյանի գլխավորությամբ՝ նվազել են բովանդակության սահմանափակումները և համացանցը օգտագործողների իրավունքների ոտնահարման դեպքերը: Մասնավորապես, առցանց լրագրողների նկատմամբ բռնությունները նվազել են, թվային լրատվամիջոցներն ավելի մեծ ազատություն են ստացել տնտեսական և քաղաքական ճնշումներից»:

Իր այս ցուցանիշով Հայաստանը տարածաշրջանի երկրներից առաջատարն է: Ադրբեջանը կրկին ճանաչվել է ոչ ազատ երկիր՝ հավաքելով 39 միավոր՝ նախորդ տարվա 40-ի փոխարեն (45-րդ հորիզոնական)։ Վրաստանը պահպանել է նախորդ տարվա ցուցանիշը՝ 75 միավորը և ճանաչվել է ազատ երկիր (10-րդ հորիզոնական)։ Թուրքիան և Իրանը ոչ ազատ երկրների շարքում են:

Այս տարի զեկույցում գնահատման միավորների մեթոդաբանությունը փոխվել է: 100 միավորանոց սանդղակում, որքան բարձր է երկրին տրված միավորը, այնքան բարձր է տվյալ երկրում համացանցի ազատության մակարդակը (նախկինում գործում էր հակառակ տրամաբանությունը): Ամենաբարձր միավորներ ստացած երկրներն են Իսլանդիան (95) և Էստոնիան (94), իսկ ամենացածր Իրանն (15) ու Չինաստանը (10):