Եգիպտոսում «պատանդ» մնացած հայ զույգի նորածնի վերադարձի վկայականի հարցը լուծվել է

Վիճակախաղով տոմս շահելու հետևանքով Շարմ էլ Շեյխ հանգստի մեկնած հայ զույգի նորածին երեխայի ծննդյան վկայականի հարցը լուծվել է, դեսպանությունը երեխայի համար պատրաստել է վերադարձի վկայական: Այս մասին ԼՈՒՐԵՐ.com-ին հայտնեց Արտաքին գործերի նախարարության մամուլի խոսնակ Աննա Նաղդալյանը:

Նա նշեց՝ նոյեմբերի 2-ին ՀՀ քաղաքացի Լիլիթ Առաքելյանը Եգիպտոսի Արաբական Հանրապետության Շարմ էլ Շեյխ քաղաք ժամանելուց հետո տեղափոխվել է հիվանդանոց, որտեղ վաղաժամ ծննդաբերել է։ Երեխայի հայրը կապ է հաստատել դեսպանության հետ նոյեմբերի 4-ին, որի արդյունքում դեսպանությունը ներկայացրել է նրան երեխայի անհրաժեշտ փաստաթղթերի պատրաստման գործընթացը. «Դեսպանության ջանքերով հնարավոր է եղել շատ կարճ ժամկետում ստանալ ծննդյան վկայական, որի հիման վրա դեսպանությունը երեխայի համար պատրաստել է վերադարձի վկայական։ Քաղաքացիները դեսպանությանը տեղեկացրել են հիվանդանոցի անձնակազմի հետ օտար լեզվով հաղորդակցվելու, երեխայի ծնողի կորած անձնական իրերի, երեխայի դուրսգրման ժամկետի հետ կապված խնդիրների մասին: Նոյեմբերի 6-ին Եգիպտոսում ՀՀ հյուպատոսը ժամանել է Շարմ էլ Շեյխ, հանդիպել քաղաքացիներին, փոխանցել վերադարձի վկայականը, անցկացրել է հանդիպումներ տուր օպերատորի ներկայացուցչի, ինչպես նաև հիվանդանոցի բժշկական ու վարչական անձնակազմի հետ։ Արդյունքում լուծվել են վերոհիշյալ և մի շարք այլ խնդիրներ՝ կախված մասնավորապես հիվանդանոցի պահանջած ծախսերի հետ»,- ասաց նա՝ նշելով, որ դեսպանությունը պարբերական կապի մեջ է գտնվում քաղաքացիների հետ:

Նա փոխանցեց նաև, որ այս պահի դրությամբ երեխան ապահովված է համապատասխան բժշկական օգնությամբ, սննդով, հագուստով և այլն։ 

Ավելի վաղ տեղեկացրել էինք, որ օրեր առաջ Նարեկ Հովհաննիսյանն ու Լիլիթ Առաքելյանը ահազանգել էին՝ Եգիպտոսում «պատանդ» են մնացել, չեն կարողանում վերադառնալ Հայաստան, քանի որ կնոջը կեսարյան հատում իրականացնելու համար իրենցից 5000 ԱՄՆ դոլար են պահանջել, և քանի որ այդքան գումար չեն ունեցել՝ դիմել են Եգիպտոսում ՀՀ դեսպանատանը, որպեսզի իրենց աջակցեն: Դեսպանատան միջամտությամբ 5000 դոլարն իջեցվել է մինչև 3500-ի, սակայն զույգն այդ գումարը նույնպես չի ունեցել։

Սոնա Հարությունյան