Մոսկվան հստակեցնում է խաղի կանոնները. Արցախի հարցով հանրաքվե կլինի
Վերլուծական
«Մեդիամաքս» գործակալության հետ հարցազրույցում Ռուսաստանի ԱԳ նախարար Սերգեյ Լավրովը հայտարարել է, որ Լեռնային Ղարաբաղի վերջնական իրավական կարգավիճակի մասին հարցը դասվում է առավել բարդ հարցերի թվին: Միևնույն ժամանակ Լավրովը նշել է, որ Արցախի կարգավիճակը պետք է քաղաքական ճանապարհով որոշվի բանակցությունների ընթացքում՝ իրավաբանորեն պարտավորեցնող կամարտահայտման հիման վրա: Այս աշխատանքի չափանիշները՝ ներառյալ կազմակերպական ասպեկտները, կողմերը դեռ պետք է համաձայնեցնեն:
Լավրովի ասածը ոչ այլ ինչ է քան հանրաքվեի մեխանիզմի կիրառման առաջարկ:
Այն մասին, որ Արցախի հարցի վերջնական լուծումը կարող է լինել հանրաքվեի միջոցով, խոսել է նաև վարչապետ Փաշինյանը իր վերջին ուղղիղ եթերներից մեկի ընթացքում: Փաշինյանը այսօր Արցախում է, իսկ վաղը Հայաստան կժամանի Սերգեյ Լավրովը, կարելի է ենթադրել, որ այս ամենը զուտ պատահականություն կամ զուգադիպություն չէ: Իհարկե, հանրաքվեի տարբերակը ամենաընդունելի տարբերակն է իշխանությունների համար, քանի որ նախ՝ հանրաքվեն կարելի է կեղծել և այդ հարցում կարող է օգնության հասնել բազմափորձ Մուկուչյանը, և հանրաքվեի արդյունքների համար կարելի է քաղաքական պատասխանատվություն չկրել, ամեն բան բարդել ժողովրդի կամքի վրա:
Հանրաքվեի ռիսկերի մասին կարելի է երկար խոսել, սակայն կարելի է առանձնացնել երկու հիմնական վտանգներ: Առաջինը՝ նմանատիպ հանրաքվեի անցկացումն է նաև Ադրբեջանում, դրանից բխող բոլոր հետևանքներով և իհարկե, այն, ինչի մասին ռուսական կողմը ակնարկեց ՀԱՊԿ խորհրդարանական վեհաժողովի վերջին նիստի կուլուարներում՝ ՀԱՊԿ խաղաղապահ ուժերի տեղակայում Արցախում: Հասկանալի է, որ այս ծրագիրը դժվար թե Արևմուտքի սրտով լինի, հետևաբար այն իրագործելն էլ բավական մեծ քաղաքական կամք և մանեւրելու կարողություն է պահանջելու Նիկոլ Փաշինյանից:
Արևմուտքը, դժվար թե համակերպվի Բոլթոնի պլանի մերժման և ռուսական զորքերի՝ Հարավային կովկասում ամրակայման հետ: Իրականում, սա այն ծրագիրն է, որը պետք է իրականացներ Սերժ Սարգսյանը, ով, սակայն, չգնաց նման ռիսկի, կամ նրան այդ ռիսկին գնալուց շատ հաջող կերպով հետ պահեց հեղափոխությունը: Արդյունքում՝ ռիսկի գնալու է Փաշինյանը՝ ինչ-ինչ համաձայնությունների շրջանակում: Միևնույն ժամանակ պարզ է, որ այդ քայլը ծնելու է նոր ռիսկեր և մարտահրավերներ: Պատրա՞ստ է արդյոք դրանց Փաշինյանի թիմը…
ՈՒՂԻՂ ԵԹԵՐ
Ամենադիտված 
«Խոպան գնալուց առաջ գնացել էին աներոջ տուն՝ հաջող անելու». մանրամասներ վթարից մահացած ընտանիքի մասին
