100 համերգ` Հայոց ցեղասպանության նահատակների հիշատակին

Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի նախագահ Սերժ Սարգսյանի բարձր հովանավորությամբ ՀՀ մշակույթի նախարարությունը, «Փյունիկ» մարդկային ռեսուրսների զարգացման հիմնադրամը և Հայոց ցեղասպանության թանգարան-ինստիտուտը ներկայացնում են 100 համերգից բաղկացած համերգաշար` նվիրված Հայոց ցեղասպանության զոհերի հիշատակին: 

Նոյեմբերի 30-ին` ժամը 19.00-ին, «Արամ Խաչատրյան» համերգասրահում Հայաստանի պետական երիտասարդական և «Յունիսեֆ» մանկական նվագախմբերի (գեղարվեստական ղեկավար և գլխավոր դիրիժոր` Սերգեյ Սմբատյան), ինչպես նաև Հայաստանի պետական ֆիլհարմոնիկ և Ալ. Սպենդիարյանի անվան օպերայի և բալետի ազգային ակադեմիական թատրոնի նվագախմբերի փողային կազմերի, Հայաստանի պետական ակադեմիական երգչախմբի մասնակցությամբ տեղի է ունեցել համերգաշարի առաջին համերգը: Մենակատարներ` Վարդան Մամիկոնյան (դաշնամուր, Ֆրանսիա), Վարդուհի Խաչատրյան (մեցո սոպրանո, Շվեյցարիա), Գևորգ Իգնատիոս Հաճյան (տենոր, Հայաստան), Վաչե Հովեյան (ալտ, Հայաստան), Գևորգ Հակոբյան (բարիտոն, Հայաստան): 
Համերգին հնչեցին Կոմիտասի, Մուշեղ Աղայանի, Մորիս Ռավելի, Պյոտր Իլյիչ Չայկովսկու, Էդուարդ Միրզոյանի, Ալեքսանդր Հարությունյանի, Վարդ Մանուկյանի, Տիգրան Չուխաջյանի, Առնո Բաբաջանյանի, Պիետրո Մասկանիի, Ղազարոս Սարյանի, Սերգեյ Ռախմանինովի, Ֆրանց Շուբերտի, Արմեն Սմբատյանի ստեղծագործություններից:
ՀՀ մշակույթի նախարարությունում համերգաշարի մեկնարկին նվիրված ասուլիսին մասնակցում էին ՀՀ մշակույթի նախարար Հասմիկ Պողոսյանը, «Փյունիկ» մարդկային ռեսուրսների զարգացման հիմնադրամի պատվո նախագահ Գաբրիել Ջամբարջին, հիմնադրամի հոգաբարձուների խորհրդի նախագահ Լևոն Սարգսյանը, Հայոց ցեղասպանության թանգարան-ինստիտուտի տնօրեն Հայկ Դեմոյանը, Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը և համերգին հանդես եկող մենակատարները: