ԼՂՀ արտգործնախարարությունը պատրա՞ստ է զիջել ազատագրված տարածքները

Լեռնային Ղարաբաղի Հանրապետության Արտաքին Գործերի Նախարարության օգոստոսի 2-ի հայտարարությունը ոչ այլ ինչ է, քան ազատագրված տարածքները թշնամուն հանձնելու պատրաստակամություն: Հայտարարությունը պարտվողական ոճ ու բնույթ ունի, իսկ ԼՂՀ Արտգործնախարարությունը իրավունք չունի տարածելու նմանօրինակ հայտարարություններ։ Այս մասին Lurer.com-ի հետ զրույցում ասել է Ռազմավարական մշակումների կենտրոնի տնօրեն Հրանտ Մելիք-Շահնազարյանը:

«Բովանդակությունից բխում է, որ նրանք երաշխիքներ են տվել միջազգային հանրությանը՝ չբնակեցնելու ազատագրված տարածքները, ինչն էլ նշանակում է առկա թշնամուն դրանք զիջելու պատրաստակամություն։ Կարծում եմ, որ բացարձակ անընդունելի տարբերակ է, և պետք է հնարավոր ճանապարհներով կասեցնել նման քաղաքականության իրականացումը։ Ճանաչելով Արցախի Հանրապետության ԱԳՆ և դրա կառուցվածքը ու հաշվի առնելով այն փաստը, որ ԱԳՆ-ն չունի նախարար, այլ միայն կա ժամանակավոր պաշտոնակատար՝ չեմ բացառում, որ հայտարարությունը գրել է ոչ կոմպետենտ և ոչ լիազորված մեկը։»,- ասել է նա՝ ավելացնելով, որ բոլոր դեպքերում նման հայտարարությունից հետո թե՛ միջնորդները, թե՛ հակառակորդը միանշանակ համապատասխան եզրակացություն կանեն։

Նշենք, որ Արցախի արտաքին գերատեսչությունն արձագանքել է ԵԱՀԿ-ում Ադրբեջանի մշտական առաքելության կողմից տարածված նոտային, որը վերաբերում է ԼՂՀ տարածքների բնակեցմանը: «Չնայած այն ակնառու փաստին, որ իր տարածքում վերաբնակներ ընդունելը ԼՂՀ ինքնիշխան իրավունքն է, տարածվածը իսպառ հիմնազուրկ ապատեղեկատվություն է, ինչը հավաստում են 2010 թ. ընթացքում այդ տարածքի իրավիճակի՝ ԵԱՀԿ գնահատման առաքելության կողմից անցկացված դիտարկումների արդյունքները: Ինչ վերաբերում է ԵԱՀԿ փաստահավաք առաքելության 2005 թ. հաշվետվությանը, որը վկայակոչում է Ադրբեջանի մշտական առաքելությունը, անհրաժեշտ ենք համարում հիշեցնել, որ համաձայն ԵԱՀԿ Մինսկի խմբի համանախագահների հայտարարության՝ առաքելությունը չի հայտնաբերել «ոչ մի ակնհայտ կազմակերպված վերաբնակեցում» և «չի հաստատվել, թե բնակեցումը նպատակամետ քաղաքականության արդյունք է», - նշված է ԼՂՀ ԱԳՆ հայտարարության մեջ: