Իտալիայի հավաքականը ջախջախեց Հայաստանի ընտրանուն (տեսանյութ)

Եվրո-2020-ի ընտրական փուլի վերջին տուրում Հայաստանի ազգային ընտրանին  արտագնա խաղում ուժերը չափեց Իտալիայի հավաքականի հետ:

Հայաստանի ընտրանին պարտվեց խոշոր` 1:9 հաշվով:

Խաղի 9-րդ րոպեին հաշիվը բացեց Չիրո Իմոբիլեն,  մեկ րոպե անց աչքի ընկավ նաև Նիկոլո Ձանիոլոն:

29-րդ րոպեին Նիկոլո Բարելան խփեց իր թիմի 3-րդ գոլը, իսկ  երեք րոպե անց Իմոբիլեն իր երկրորդ գոլը հեղինակեց այս խաղում:

Երկրորդ խաղակեսում Ձանիոլոն խփեց այս խաղում իր երկրորդ գոլը, որից հետո իտալացիները ևս երեք գոլ խփեցին մերոնց դարպասին. այս անգամ աչքի ընկավ նախ Ալեսիո Ռոմանյոլին (72') , ապա 75-րդ րոպեին Ժորժինյոն դիպուկ իրացրեց նշանակված 11 մետրանոց հարվածը, երկու րոպե անց Ռիկարդո Օրսոլինին  հաշիվը դարձրեց 8:0:

Հայաստանի ազգային ընտրանու միակ գոլը  79-րդ րոպեին խփեց Էդգար Բաբայանը: Հանդիպման վերջին գոլը գրանցվեց 81-րդ րոպեին, երբ  աչքի ընկավ Ֆեդերիկո Կյեզան: 

Սա Հայաստանի ընտրանու պատմության մեջ ամենախոշոր հաշվով պարտությունն է:

Եվրո-2020-ի J խմբում Հայաստանի ընտրանին գրավեց նախավերջին տեղը, իտալացիները` առաջին: