Ռուս մեքենավարները ՀԿԵ-ի տեխնիկան վնասե՞լ են

Արդեն տեղեկացրել էինք, որ այսօր Գյումրիի լոկոմոտիվային դեպոյի մեքենավարները գրություն էին ուղարկել ՀՀ ԱԱԾ, դատախազություն և ոստիկանություն: Ըստ մեքենավարների՝ երեկ ՌԴ-ից տասը ռուս մեքենավարներ է եկել Գյումրի, ովքեր անմիջապես, առանց փորձաշրջան անցնելու և տարածքին ծանոթանալու, ժամերի ընթացքում անցել են աշխատանքի հայերի փոխարեն: Բացի այդ, նրանք նաև նշել էին, որ ռուս մեքենավարների աշխատանքի արդյունքում  երկու էլեկտրոգնացք է վառվել:

ԼՈՒՐԵՐ.com-ի հետ զրույցում «Հարավկովկասյան երկաթուղի» ընկերության մամլո քարտուղար Ռուբեն  Գրձելյանը ասաց, որ վնասված տեխնիկայի մասին ոչինչ հստակ ասել չի կարող. «Տեղյակ չեմ՝ ցանկացած դեպքում կարող եմ ասել, որ տեխնիկան շահագործվում է, վնասվում, նորոգվում: Դա ամենօրյա աշխատանքային գործընթաց է: Հնարավոր է նաև,  որ այդպես լինի»:

«Հարավկովկասյան երկաթուղի» ՓԲԸ և «Ռուսական երկաթուղիներ» ԲԲԸ կազմակերպում են փորձի փոխանակում երկու ընկերությունների լոկոմոտիվային բրիգադների միջև: Տվյալ ծրագրի շրջանակներում Ռուսական երկաթուղիների մի խումբ մեքենավարներ՝ Հարավկովկասյան երկաթուղու հրահանգիչ-մեքենավարների ղեկավարությամբ, պրակտիկ դասընթացներ են անցնում Հայաստանի երկաթուղու տարածքում: Ծրագիրը նպատակ չի հետապնդում հայ մեքենավարներին օտարերկրյա մասնագետներով փոխարինումը: