«Հարկատեսակի ներմուծումով ավելանում է և՛ հարկատուների բեռը, և՛ խախտվում է սոցիալական արդարության սկզբունքը»

«Գաղափարը լավն է, բայց խնդիրն այն է, թե ինչ մեխանիզմով է իրագործվելու»,- այս մասին ԼՈՒՐԵՐ.com-ի հետ զրույցում ասաց տնտեսագետ Գագիկ Վարդանյանը՝ անդրադառնալով կառավարության առաջարկած նոր հարկատեսակին, որով նախատեսվում է աշխատավարձից 6% վճարել առողջության հարկի համար:

«Հարկատեսակի ներմուծումով ավելանում է և՛ հարկատուների բեռը, և՛ խախտվում է սոցիալական արդարության սկզբունքը: Ստացվում է, որ բարձր վարձատրություններ ստացող անձինք պետք է իրենց վրա վերցնեն ավելի ցածր եկամուտներ ունեցողների առողջապահական խնդիրների լուծումը: Մարդիկ հենց այնպես չեն ստանում բարձր աշխատավարձ, նրանք ներդրումներ են արել իրենց կրթության, զարգացման մեջ և նոր հասել են դրան»,- ասաց նա: 

Առողջապահության նախարարն անդրադառնալով հարկատեսակի վերաբերյալ հնչող տեսակետներին, թե «ինչու պետք է աշխատողը վճարի չաշխատող ծույլի փոխարեն»՝ նկատել է, որ դա հոգատարության դրսևորում է: Սակայն տնտեսագետի կարծիքով՝ մարդկանց խղճի վրա ազդելով նոր հարկատեսակ ներմուծելը ճիշտ չէ. «Հարցը բարոյականության տեսանկյունից դիտարկելը ճիշտ չէ: Կարող են ասել ձեր մայրերի, քույրերի համար է, բնականաբար նման հարցադրումներ կլինեն, սակայն նման ոչ կոռեկտ հարցադրում չպետք է անել, որովհետև նման բարոյական կողմերի վրա չի կարելի խաղալ, գնալ խղճահարության: Մենք կառուցում ենք շուկայական տնտեսություն, ամեն ինչ պետք է այդ հիմքի վրա լինի: Եթե ոչ, ապա մյուս տարբերակն այն է, որ լինի պետական ապահովագրություն, ինչպես կար Խորհրդային Միության տարիներին»,- նշեց տնտեսագետը:

Նա նշեց, որ փաստաթղթղում եղած վիճակի նկարագրությանը համաձայն է, սակայն խնդիրը այլ է. «Արդյո՞ք մեխանիզմը գործուն կլինի հիմնված նոր հարկատեսակի ներմուծման հետ: Ռիսկեր կան, որոնք չեն հաշվել: Շատ կարևոր է, որ պարտադիր համակարգի ենք անցնում, շատ կարևոր է, որ հասարակության համերաշխության սկզբունքն է առաջարկվում կիրառվել, սակայն կարևոր է նաև, որ մարդիկ հիվանդության պատճառով սնանկության չգնան: Հարկավոր է շերտավորել մարդկաց, որոնց մեջ պետք է մտնեն հատուկ հոգածության կարիք ունեցող մարդիկ, կենսաթոշակառուները և նրանց պետությունը պետք է ապահովագրի»,- ասաց Գագիկ Վարդանյանը: 

Սոնա Հարությունյան