«Մութ ամպեր»՝ Մարությանի գլխին. ովքեր են փորձում օգտվել ընձեռնված «նվերից»

Երեւանի քաղաքապետ Հայկ Մարությանը նախօրեին ֆեյսբուքյան ուղիղ եթերի ընթացքում փորձել է հերքել քաղաքապետարանի աղբատար «Կամազների» նվիրաբերման հետ կապված աղմկոտ պատմության կոռուպցիոն կասկածները: Ստացվել է դա Մարությանի մոտ, թե ոչ՝ կորոշեն երևանցիները, իսկ մինչ այդ պետք է ընդգծել մեկ այլ ուշագրավ հանգամանք՝ «Կամազների» հետ կապված պատմության և Մարությանի հնարավոր հրաժարականի ֆոնին ակտիվացել են նախկինում Երևանի քաղաքապետի աթոռին հավակնող անձինք և «Իմ Քայլի» սորոսական թևը: Սորոսականներն արդեն իսկ թափանցիկ մեսիջներով սկսել են պահանջել քաղաքապետի հրաժարականը՝ գուցե հասկանալով, որ Փաշինյանը սեփական վարկանիշը փրկելու համար կարող է գնալ կտրուկ քայլի և զահաբերել Մարությանին, և սորոսականները հույս ունեն, որ այդ դեպքում գուցե հաջողվի քաղաքապետի աթոռը «իրենցով անել»:

Սկանդալի ֆոնին ակտիվացել են նաև «Լույս» դաշինքի անդամները, մասնավորապես՝ Էդմոն Մարուքյանը, ով քաղաքապետի լայվից հետո որոշեց այն փաստաթղթով «ջրել» և իր ֆեյսբուքյան էջում տեղադրեց լուսանկար, որտեղ քաղաքապետը նստած է Գագիկ Խաչատրյանի որդիների մեջտեղում: Մարուքյանին հաջորդեցին Երևանի ավագանու «Լույս» խմբակցության անդամ Դավիթ Խաժակյանի և ԱԺ «Լուսավոր Հայաստան» խմբակցության պատգամավոր Կարեն Սիմոնյանի՝ Հայկ Մարությանի հրաժարականը պահանջող հայտարարությունները:

«Լուսավոր Հայաստանի» ակտիվացումը ակնհայտ է, թերևս նրանք հասկանում են, որ Երևանի ավագանու արտահերթ ընտրությունները սարերի հետևում չեն, իսկ «Իմ Քայլի» շանսերը՝ Երևանում մեկ տարվա ձախողված կառավարումից հետո զգալիորեն կրճատվել են: Երևանը ռազմավարական նշանակություն ունի, քանի որ այստեղ է բնակվում ՀՀ բնակչության կեսից ավելին, իսկ դա էլ իր հերթին կարող է հավելյալ լծակներ ապահովել համապետական ընտրությունների ժամանակ: Դա է պատճառը, որ ընդդիմությունը անցել է գործի՝ թիրախավորելով Մարությանին, օգտվելով հենց վերջինիս իսկ ընձեռած նվերից…