Արագացված զինվորական ծառայության արդյունքում՝ բանակը միշտ կլինի աղքատների տեղը. Հարություն Բաբայան

«Իմ քայլը» խմբակցության պատգամավոր Հայկ Սարգսյանի` «Արագացված զինվորական ծառայության մասին» օրենսդրական նախաձեռնության շուրջ ԼՈՒՐԵՐ.com-ի թղթակիցը զրուցեց «Լուսավոր Հայաստան» խմբակցության պատգամավոր Հարություն Բաբայանի հետ: 

«Ես վստահ եմ, որ այդ նախագիծը կառավարությունը կմերժի, որովհետև մենք բանակի խնդիր ունենք: Կարծում եմ, որ այդ տարբերակով խնդիրները լուծել չենք կարող: Մենք բանակաշինության խնդիր ունենք ու դժվար թե այդ գումարով կարողանանք մեր խնդիրները լուծել»,- ասաց պատգամավորը:

Նրա խոսքով՝  նախագծի մեջ չկա ստատիստիկա, վերլուծություն, քննարկում. «Նախագիծը նման է կարծիքի  կամ վարկածի, որը առաջ է քաշվել: Կառավարությունը չի ընդունի: Բայց եթե անգամ շրջանառության մեջ դրվի, ես դեմ եմ քվերակելու»:

Մեզ հետ զրույցում պատգամավորն ընդգծեց, որ բանակը բոլորինս է՝ անկախ նրանից՝ հարուստ ենք, թե աղքատ.«Չի կարող ինչ-որ մեկը շատ հարուստ լինել ու ազատվել բանակից, արդյունքում՝ բանակը միշտ լինի աղքատների տեղը: ՀՀ յուրաքանչյուր քաղաքացի, ով ծառայել է մեր բանակում, պետք է լինի երկրի պատվելի քաղաքացի, իսկ ով խուսափել է ծառայությունից, բացառությամբ՝ առողջական կամ ինչ-որ այլ լուրջ խնդիրներ ունեցողները, ապա պետք է ուղղակի ճիշտ չընկալվի մեր հասարակության կողմից: Մենք պատերազմող երկիր ենք ու բանակի նկատմամբ պետք է առանձնակի ուշադիր լինենք»: