Ասադի բանակը «վերցրել է» Դամասկոսը. Հալեպում «որոշիչ» մարտեր են

Սիրիայի բանակը վերահսկողության տակ է վերցրել Դամասկոսի Տադամուն շրջանը՝ ընդդիմադիրների վերջին հենակետը մայրաքաղաքում, հայտնում է «ՌԻԱ Նովոստի»-ն:

Ինչպես հայտարարվել էր ավելի վաղ, Տադամունում ռազմական գործողություն էին իրականացնում կառավարական ուժերը: Շրջանը մի քանի անգամ գնդակոծվել է, ինչից հետո, ուրբաթ օրը սկսվել է շրջանի «մաքրումն ահաբեկիչներից»: Ռուսական գործակալության թղթակցի խոսքերով՝ վերջին երկու ժամվա ընթացքում քաղաքում լռություն է տիրում, ինչը կարող է նշանակել, որ ռազմական գործողությունն ավարտվել է: Ըստ կառավարական զորքերի բարձրաստիճան աղբյուրի՝ տվյալ պահին բանակը վերահսկողության տակ է վերցրել Դամասկոսի բոլոր շրջանները:

Միաժամանակ Հալեպում՝ Սիրիայի երկրորդ խոշոր քաղաքում, Ասադի զորքերը «որոշիչ գրոհ» են սկսել: Քաղաք է ներմուծվել էլիտար ստորաբաժանումների 20 հազ զինվորական՝ ապստամբներին ճնշելու համար: Նրանք շարժվում են զինյալների կողմից գրավված Սալահ-էդ-Դին շրջանի ուղղությամբ: Հրետանին և ուղղաթիռները կետային հարվածներ են հասցնում զինված ընդիմադիրների կուտակման վայրերին:

Tert.am