Սմարթֆոնների համաշխարհային շուկան աճել է 47%-ով

Canalys վերլուծական ընկերությունը հայտնել է, որ սմարթֆոնների համաշխարհային շուկան 2012թ.-ի երկրորդ եռամսյակում, նախորդ տարվա նույն ժամանակաշրջանի համեմատ, աճել է 47%-ով՝ հասնելով մինչև 158.3 մլն-ի: Վաճառքների ծավալներով առաջնային դիրք են գրավել Android սմարթֆոնները: Նշված ժամանակաշրջանում վաճառվել են Android տեսակի 107.8 մլն հեռախոս, որը 110.4%-ով գերազանցել է նախորդ տարվա նույն ժամանակաշրջանի տվյալները և կազմել է այս տարվա երկրորդ եռամսյակում վաճառված հեռախոսների ընդհանուր թվի 68.1%-ը: Ըստ Canalys ընկերության վերլուծաբանների, Android համակարգով սմարթֆոնների վաճառքի աճը պայմանավորված է Samsung ընկերության ունեցած հաջողություններից, որը կարողացել է վաճառել մոտ 45 մլն սմարթֆոն:

Samsung ընկերության բաժինը հեռախոսների համաշխարհային շուկայում կազմել է 31%: Նրան հաջորդել են Apple, Nokia, HTC և RIM ընկերությունները: Նշված ժամանակաշրջանում Apple-ին հաջողվել է մեծացնել iPhone սմարթֆոնների վաճառքի ծավալները 28%-ով՝ մինչև 26 մլն հեռախոսի: iPhone սմարթֆոնների վաճառքի բաժինն ընդհանուր վաճառված սմարթֆոնների մեջ, նախորդ տարվա 18.9%-ի համեմատ, նվազել է մինչև 16.4%:

Նշված ժամանակաշրջանում սմարթֆոնների վաճառքի ամենամեծ ծավալներն արձանագրվել են Windows Phone-ի մոտ՝ նախորդ տարվա համեմատ ավելանալով 227.3%-ով, սակայն ընդհանուր վաճառքների մեջ Windows Phone-ը շատ փոքր բաժին է զբաղեցրել՝ ընդամենը 5.1 մլն սմարթֆոն:
RIM և Nokia ընկերությունների վաճառքի ծավալները նվազել են համապատասխանաբար 32.1% և 64.6%-ով: