«Հետաքրքրությունը» վայրէջք է կատարել Մարսի վրա

MSL տիեզերական սարքը, որը հայտնի է նաև Curiosity («Հետաքրքրություն») անվամբ, երկուշաբթի առավոտյան, օգոստոսի 6-ին վայրէջք է կատարել Մարսի վրա։ Վայրէջքն ուղիղ հեռարձակմամբ ցուցադրվել է NASA-ի կայքում։ Սարքն իջել է Գեյլի խառնարանում։ 

MSL մարսագնացը ուղեծիր է բաց թողնվել 2011 թվականի նոյեմբերի 26-ին։ Այն Մարսի հետազոտության պատմության ընթացքում ամենամեծ ռոբոտացված սարքն է. դրա զանգվածը մոտ 900 կիլոգրամ է։

Մարսագնացի հիմնական խնդիրներից է մոլորակի մակերևույթային և ենթամակերևութային գրունտի քիմիական բաղադրության վերլուծությունը։ Սարքն օժված է քվադրուպոլ մասս-սպեկտրոմետրով, գազային քրոմատոգրաֆով և ռենտգենյան սպեկտրոմետրով։ Ավելին, այն զինված է նաև ենթամակերևութային սառույցի որոնման սարքավորմամբ՝ DAN-դետեկտորով։

Նշենք, որ սարքն արդեն Երկիր է փոխանցել օժանդակ սարքերով արված առաջին ցածրորակ լուսանկարները։

Գեյլի խառնարանն ավելի քան 160 կիլոմետր տրամագծով գոյացություն է, որի կենտրոնում բազմակիլոմետրանոց բլրաթումբ կա։ Այն ընտրվել է որպես MSL-ի վայրէջքի վայր, քանի որ գիտնականները կարծում են, որ հնարավոր է՝ բլրաթումբը բաղկացած է նստվածքային ապարներից, որոնք այստեղ են կուտակվել դեռ այն ժամանակներում, երբ Մարսի վրա ջուր կար։