«ՉԻ». Պատգամավորները զբաղված են Սամվել Նիկոյանին թասիբի գցելով

«ՉԻ» հաղորդմամբ՝ «Խորհրդարանի առաջիկա քառօրյայում նախատեսված է ԱԺ նախագահի եւ փոխնախագահի ընտրություններ: Ահա այս կարեւոր իրադարձությամբ պայմանավորված` ԱԺ նախագահի թեկնածու Սամվել Նիկոյանը արդեն քանի օր է հանդիպում է կոալիցիոն պատգամավորների հետ ու նրանց հորդորում դեկտեմբերի 5-ի քառօրյային չբացակայել:

Նիկոյանը ԱԺ աշխատակազմի ղեկավար Գեղամ Ղարիբջանյանից պահանջել է դեկտեմբերի առաջին օրերին գործուղումների մեկնող պատգամավորների ցուցակն ու ում կարողացել է` արգելել է մեկնել գործուղման: Իսկ ում վրա ուժը չի պատել` հորդորել է դեկտեմբերի 5-ին գործուղումը կիսատ թողնել եւ վերադառնալ Հայաստան: Եւ սա միանգամայն հասկանալի է:

Նիկոյանի թեկնածությանն առանձնապես կողմ չեն իր իսկ հարազատ Հանրապետականում, ուստի` Նիկոյանը մտահոգվելու լուրջ պատճառներ հաստատ ունի:

Չնայած ԱԺ հաշվիչ հանձնաժողովի նախագահ Գագիկ Մելիքյանը վերջինիս վստահեցրել է, որ պրոբլեմ չի լինի, եւ անհրաժեշտ «ընտրակեղծիքները» կարվեն հավուր պատշաճի:

Ավելացնենք նաեւ, որ «ՉԻ» տեղեկություններով այս օրերին ԱԺ նախագահի պաշտոնակատար Նիկոյանը բավականին լարված տրամադրության մեջ է: Բանն այն է, որ Հովիկ Աբրահամյանի պաշտոնավարության տարիներին բիզնես չունեցող պատգամավորները Ամանորին մշտապես ստացել են մեկ աշխատավարձի չափով պարգեւավճար:

Այդպիսի պատգամավորների թիվը մոտավորապես 24-ն է: Սակայն այս օրերին Նիկոյանն ամեն տեղ բողոքում է, որ ԱԺ բյուջեն դատարկ է, եւ ինքը չգիտի ինչպե՞ս գումար տալ բիզնես չունեցողներին: Բիզնեսազուրկներն էլ սպասում են, թե արդյո՞ք կկարողանա Նիկոյանն այդ հարցը լուծել, թե՞ նման հարցեր լուծելու ունակություն ուներ միայն Հովիկ Աբրահամյանը:

Մեր տեղեկություններով` Նիկոյանի համար այս հարցը լուծելը դարձել է թասիբի եւ սկզբունքի հարց: Իսկ խորհրդարանում արդեն անգամ գրազ են գալիս` կկարողանա՞ Նիկոյանը լուծել խորհրդարանի ֆինանսական խնդիրները, ինչպես դա անում էր Հովիկ Աբրահամյանը, թե՞ ոչ»: