Toyota-ն համաշխարհային շուկայի առաջատարն է

Ճապոնական Toyota ընկերությունը, որն անցյալ տարի շուկայում կորցրել էր լիդերի կոչումը, այս տարի նորից վերականգնել է առաջնային ավտոարտադրողի անունը՝ 2012թ.-ի առաջին կիսամյակում վաճառելով ավելի քան 6 մլն ավտոմեքենա: Ըստ վերլուծաբանների, Toyota ընկերությունը մոտակա 3 տարիների ընթացքում նույնպես կմնա որպես առաջնային ավտոարտադրող:

2011թ.-ը Toyota ընկերության համար չի կարելի հաջողակ տարի համարել, քանի որ ցունամիների և երկրաշարժի պատճառով ընկերությունը ստիպված է եղել ժամանակավորապես դադարեցնել Ճապոնիայում գործող 18 գործարաններից 16-ի գործունեությունը: Այդ դեպքերից հետո, դեռ ուշքի չեկած, Թայլանդում սկսվեցին մի շարք ջրհեղեղներ, որի պատճառով ընկերության մեքենաների արտադրությունը կրճատվել էր շուրջ 260,000 մեքենայով: Բացի դրանից Toyota-ն տեխնիկական խնդիրների պատճառով ստիպված է եղել հետ կանչել ավելի քան 19 մլն ավտոմեքենա: 2011թ.-ի տվյալներով Toyota-ն համաշխարհային շուկայում 7.9 մլն ավտոմեքենա արդյունքով զբաղեցրել էր երրորդ տեղը: Ճապոնական ընկերությունից առաջ էին անցել General Motors (9.02 մլն ավտոմեքենա) և գերմանական Volkswagen-ը (8.15 մլն ավտոմեքենա):

Չնայած այդ բոլոր անհաջողություններին՝ ընկերությունը կարողացել է շատ շուտ ոտքի կանգնել: 2011թ.-ի տվյալներով, ընկերության տարեկան շահույթը նվազել է ընդամենը 30.5%-ով: 2012թ.-ի առաջին կիսամյակը վերջին չորս տարիների ընթացքում ամենահաջողն է ընկերության համար, քանի որ ընկերության մաքուր շահույթն ավելացել է մինչև $3.7 մլրդ-ի:

Մասնագետները վստահ են, որ մոտակա մի քանի տարիներին Toyota ընկերությանը ոչ մի բան չի կարող խանգարել՝ շուկայում առաջնային դիրք գրավելուն: Ըստ մասնագետների անցկացրած հետազոտությունների, ամերիկյան GM-ն այսօր շատ թույլ է, քանի որ կորցնում է ամերիկյան և եվրոպական շուկայի իր մասնաբաժինը: Դրա հետ մեկտեղ, GM-ը ոչ մի պատկերացում չունի,թե ինչպես լուծել առաջացած խնդիրները: Toyota ընկերությանը կարող է խանգարել միայն գերմանական Volkswagen-ը: Գերմանական ավտոարտադրողը շարունակում է իր դիրքերն ամրապնդել Չինաստանում և ԱՄՆ-ում, իսկ Եվրոպական շուկայում Volkswagen-ը վաղուց մոնոպոլ դիրք է գրավում: Ուստի մի քանի տարի հետո ավտոմեքենաների համաշխարհային շուկայի լիդերը կարող է փոխվել: