Հաղորդում հանցագործությունների մասին. ի՞նչ քայլեր կձեռնարկի Փաշինյանը

Վերլուծական 14 Դեկտեմբեր, 2019 16:30

Երեկ երեկոյան ուշագրավ հարցազրույցով է հանդես եկել ՀՖՖ նախկին նախագահ Ռուբեն Հայրապետյանը: Վերջինս հիշեցնենք մեղադրվում է նրանում, որ վերջինս, միաժամանակ հանդիսանալով «Զարգացման հայկական բանկ»-ի նախագահ և «Զեյթունի կահույքի ֆաբրիկա» ԲԲԸ-ի փաստացի սեփականատեր, 2012 թ.-ից մինչև 2018 թ.-ը իր ենթակա աշխատակիցների միջոցով կազմակերպել է հանրապետության մի քանի քաղաքներում ֆուտբոլի մարզադաշտերի ու մարզադպրոցների կառուցման և վերանորգման աշխատանքներ: Հարցազրույցի ընթացքում Հայրապետյանը մի կողմից հերքեց իրեն ներկայացրած մեղադրանքները և կարելի է ասել, որ ինքն իր հերթին հանդես եկավ ոչ պակաս սուր մեղադրանքներով և հայտարարություններով: Հիշեցնենք, որ օրենքի տեսանկյունից՝ հանրային կերպով հնչեցրած հայտարարությունները կարող են դիտարկվել իբրև հաղորդում հանցագործության մասին:

Եվ այսպես, Հայրապետյանի պնդմամբ՝ Անդրանիկ Քոչարյանը, ով այսօր ՔՊ առանցքային դեմքերից մեկն է, որպես հին ընկեր, մի քանի օր առաջ նախազգուշացրել է իրեն հեռանալ երկրից, քանի որ Նիկոլ Փաշինյանը իրեն ձերբակալելու հրաման է տվել: Ստացվում է, եթե Փաշինյանը օրեր առաջ պետական համակարգի դիմադրության մասին էր խոսում, ապա այսօր Հայրապետյանը մատնացույց է անում այդ դիմադրության «օջախները»: Քոչարյանի պատասխանը չուշացավ, վերջինս հայտարարեց, որ նախաքննության ընթացքում դեռ առիթ կունենաք ասելու, թե ով է այդ «ընդհանուր ընկերը», որ Հայրապետյանին նման բան է «փոխանցել», դա էլ այն դեպքում, երբ չխախտելով գործի ընթացակարգը, նրան ինչ-որ բանում նախազգուշացնել կարող է միայն գործի վարույթը իրականացնող մարմինը: Անդրանիկ Քոչարյանը ակնհայտ կերպով փորձում է «մաքրել» իրեն՝ սլաքները ուղղելով դեպի ԱԱԾ նախկին պետ Արթուր Վանեցյանը, ով և հանդիսանում էր վարույթը իրականացնող մարմնի ղեկավար: Քոչարյանի ակնարկը պարզ է, և այդ ակնարկը նման բացահայտ կերպով հնչում է թերևս առաջին անգամ՝ խոսքը ԱԱԾ նախկին պետի կողմից նախկիններին տեղեկատվություն տրամադրելու մասին է և ըստ Քոչարյանի՝ Հայրապետյանի ընկերը Վանեցյանն է, ոչ թե ինքը, մինչդեռ մամուլի բազմաթիվ հրապարակումների հիման վրա կարող են փաստել, որ հենց Քոչարյանն է մշտապես հանդիսացել Հայրապետյանի «մարդը»: Մասնավորապես՝ Քոչարյանը տարիներ առաջ տված հարցազրույցներից մեկում նշել էր բառացիորեն հետևյալը՝ «Ռուբեն Հայրապետյանը իմ ընկերն է, եւ ինքը Հրանտ Մաթեւոսյանի տանը ինձ հետ միասին միշտ եղել է ցանկալի հյուր, որովհետեւ Հայաստանում շատ քչերը գիտեն, որ Հրանտ Մաթեւոսյանի առողջական խնդիրների անմիջական լուծման պատասխանատվությունը Ռուբեն Հայրապետյանը վերցրել է իր վրա: Ռուբեն Հայրապետյանը` որպես իմ ընկեր, ինձ եւ իմ ընտանիքին էլ է շատ անգամներ օգնել, եւ մեր հակասությունները չեն ազդել եւ չեն կարող ազդել մեր ընկերության վրա»: Այսօր, ինչպես երևում է, այդ «ընկերության» վրա ազդել են քաղաքական նպատակահարմարությունները:

Հայրապետյանի հայտարարությունը կոտրում է իշխանությունների կողմից պնդվող ևս մեկ միֆ. այն, որ վերևից իրավապահ համակարգին հրահանգներ չեն իջեցվում: ՀՖՖ նախկին նախագահը ուշագրավ հայտարարություն է արել նաև կապված ԲՋՆԻ գործարանի շուրջ ստեղծված իրավիճակի հետ: Ռուբեն Հայրապետյանը, մասնավորապես, ներկայացրել է ՊԵԿ-ից վերցված տեղեկանք, համաձայն որի՝ Բջնի գործարանի նախկին սեփականատեր Խաչատուր Սուքիասյանը, գործարանը աշխատեցնելով մոտ 4 տարի, առհասարակ հարկ չի մուծել: Բայց ինչպես ասում են՝ սա դեռ ամենը չէ. Սուքիասյանին պատկանելու ողջ ընթացքում մուծվել է գրեթե այնքան հարկ, որքան Հայրապետյանը մեկ տարվա ընթացքում: Նման հայտարարությունից հետո վարչապետ Փաշինյանը առնվազն պետք է շտապ հանձնարարի ստուգումներ անցկացնել գործարանում` Սուքիասյանին պատկանելու ժամանակահատվածում տարիներով և՛ չմուծված, և՛ մուծված չնչին հարկերի մասով և միայն դրանից հետո գործարանը Սուքիասյանին վերադարձնելու մասին մտածի:

Հայրապետյանի ևս մեկ հայտարարության հետքերով պատկան մարմինները պարտավոր են մանրակրկիտ ստուգումներ նախաձեռնել: Խոսքը՝ ՀՖՖ գործկումում ստեղծված իրավիճակի մասին է, որի մասին բարձրաձայնեց Հայրապետյանը: Հայրապետյանի խոսքով՝ երկու թեկնածուներն էլ ֆեյք են: «Պատգամավոր Արեն Մկրտչյանն իրավունք չունի գործկոմի անդամ առաջադրվելու, Նիկողոսյան Արմենը իրավունք չունի ՀՖՖ նախագահի թեկնածու առաջադրվելու, որովհետև վերջին 5 տարվա մեջ անընդհատ չի զբաղվել ֆուտբոլով: Մելիքբեկյան Արմենը նույնպես իրավունք չունի ՀՖՖ նախագահ լինելու»,- հայտարարել է Հայրապետյանը: Արմեն Նիկողոսյանի մասով Հայրապետյանը փաստացի հանցագործության մասին ևս մեկ հաղորդում տվեց՝ պնդելով, որ ինքն է հեռացրել վերջինիս պաշտոնից՝ ֆեդերացիայի փողերը յուրացնելու և վատնելու համար: Այս դրվագը ևս պետք է դառնա իրավապահների ուսումնասիրության առարկա: Ոչ թե իրավապահների, այլ այս անգամ հանրության ուշադրության պետք է արժանանա նաև այն հանգամանքը, որի վրա հատուկ ակցենտ արեց ինքը Հայրապետյանը. այն է, որ Իմ Քայլի հիմնադրամից բազմաթիվ անգամ դիմել են իրեն՝ հիմնադրամի համար գումար ուզելով: Ընդամենը մի քանի ամիս առաջ Փաշինյանը, խոսելով Նոր Հայաստանում գործող հիմնադրամների մասին, հայտարարել էր, որ դրանք նախկին օլիգարխներից և օդիոզ դեմքերին երբեք որևէ գումարային պահանջ չեն ներկայացրել:

Ընդհանրապես, պետք է փաստել, որ անկախ նրանից, թե ինչում է մեղադրվում Հայրապետյանը, անկախ նրանից ինչ որոշում կկայացվի և կձերբակալեն նրան, թե ոչ՝ իր հարցազրույցում ՀՖՖ նախկին ղեկավարը շոշափեց մի շարք արատավոր երևույթներ, որոնք ի հեճուկս իշխանությունների հավաստիացումների, ինչպես երևում է, այսօր էլ են առկա Նոր Հայաստանում, և եթե օրենքի առջև բոլորը իսկապես հավասար են, ինչպես պնդում էր հեղափոխության կարգախոսներից մեկը, ապա վարչապետ Փաշինյանից և իրավապահ համակարգից շատ կոնկրետ քայլեր են ակնկալվում վերը նշված բոլոր հարցադիմումների մասով...