Նոր իշխանությունների սկանդալային դեմքերը. Էրիկ Գրիգորյան

Ամուլսարի հավանական շահագործման շուրջ կրքերը նորից սկսել են եռալ և այդ ֆոնին կրկին առաջին պլան է եկել շրջակա միջավայրի նախարար Էրիկ Գրիգորյանը և վերջինիս անձի շուրջ գրեթե մեկ տարի տեղի ունեցող սկանդալները: Բանն այն է, որ Գրիգորյանը իրավամբ կարող է համարվել Նիկոլ Փաշինյանի կաբինետի այն անդամներից մեկը, ով ամենա շատն է հայտնվել տարատեսակ աղմկահարույց պատմությունների կենտրոնում: Օրինակ, պաշտոնը ստանձնելուն պես ի հայտ եկավ վերջինիս կապը «Լիդիան Արմենիա» ընկերության հետ, որտեղ  Գրիգորյանը աշխատել էր: Այն բանից հետո, երբ մամուլում ակտիվորեն սկսվեց քննարկել Գրիգորյանի երբեմնի համագործակցությունը Լիդիանի հետ, բնապահպանները ՝ Ամուլսարում տեղի ունեցող զարգացումների ֆոնին նախարարին մեղադրեցին հօգուտ Լիդիանի լոբբինգ իրականացնելու մեջ, մինչդեռ ինքը Գրիգորյանը  արդյունաբերական հսկայի ստվերային համագործակցության հետ բոլոր կապերը իհարկե հերքեց: Գրիգորյանի անունը հոլովվեց կրկին Ամուլսարի հանքի շահագործման համատեքստում, սակայն արդեն Ջերմուկի ավագանու վրա ճնշումներ գործադրելու առումով: 

Ամուլսարի թեման դեռ չփակված նախարարը մեկ այլ պատմության կենտրոնում հայտնվեց, պատմություն, որը սակայն կարող էր անչափ թանկ գին նստել Հայաստանի վրա՝ ավարտվելով Սևանա լճի կորուստով: Բանն այն է, որ  զեկուցելով, թե ինչ քայլեր են կատարվել Սևանի փրկության ուղղությամբ, նախարարը ոչ ավել ոչ պակաս հայտարարել էր, որ Սևանը ինքնամաքրվում է և անհանգստանալու առիթներ չկան, ավելին՝ նա «հանգստացրել» էր հասարակությանը , պնդելով, որ ոչ միայն Սևանն է ծաղկել, այլ նաև Սև ծովը: Դրանից հետո նախարարը հայտնվեց հանրության քննադատության կենտրոնում, շատերի կարծիքով Սևանի մաքրման հարցում պատկան մարմինները դանդաղել էին և միանգամից չէին գործադրվել անհրաժեշտ բոլոր քայլերը (անգամ պատգամավորներից բողոքներ հնչեցին, որ Գրիգորյանը չէր ներկայացել Սևանի հարցով ԱԺ կարևոր քննարկմանը) և դա էր պատճառը, որ իրավիճակը դուրս էր եկել վերահսկողությունից: Ի ուրախություն բոլորիս փաստենք, որ խնդիրը ամեն դեպքում  լուծվեց, իսկ դա թերևս ամենա կարևորն է:

Մամուլում եղան նաև հրապարակումներ, որոնք կասկածի տակ էին առնում նախարարի ներկայացրած այս կամ այն ցուցանիշը, թիվը, վերջինիս մեղադրում էին իր նախորդի ձեռքբերումները «յուրացնելու» մեջ: Բացի այդ, Գրիգորյանը հայտնվեց մամուլի ուշադրության կենտրոնում, կապված պետականորեն պաշտպանվող ազգային պարկի տարածքում։ երկրաբանական հետազոտությունների թույլտվություն տրամադրելու հետ: Շատերի կարծիքով այդ թույլտվության օրինականությունը հարցեր էր առաջացնում: Դեպք եղավ, երբ նախարարին անգամ մեղադրեցին սահմանադրության մի քանի հոդված խախտելու մեջ:

Հ.Գ.նյութը արդեն հրապարակվել էր, երբ մեզ հետ կապ հաստատեց  նախարարի մամուլի քարտուղար Դավիթ Գրիգորյանը, ում կարծիքով նյութում առկա պնդումները խեղաթյուրում են իրականությունը, և պահանջում էր հստակեցնել վերոնշյալ տեղեկությունները: Նախարարի մամուլի քարտուղարի զանգից հետո նյութում ավելացնում ենք նաև մամուլում առկա աղբյուրների ակտիվ հղումները: