Մեքսիկական Միացյալ Նահանգների Պատգամավորների պալատի նախագահն այցելել է ՀՀ դեսպանություն

Մեքսիկական Միացյալ Նահանգների Պատգամավորների պալատի նախագահ Լաուրա Ռոխասը (Laura Rojas) դեկտեմբերի 13-ին այցելել է Մեքսիկայում Հայաստանի Հանրապետության դեսպանություն, որտեղ դեսպան Արա Այվազյանի հետ ունեցել է աշխատանքային հանդիպում։  Այս մասին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից։

«Հանդիպմանը մասնակցում էին նաև Պատգամավորների պալատի Հայաստանի հետ բարեկամության խմբի նախագահ, պատգամավոր Ադոլֆո Ռամիրես Տոռեսը (Adolfo Torres Ramirez), Խորհրդարանի արտաքին հարաբերությունների հաձնաժողովի քարտուղար, պատգամավոր Սառայի Նունյես Սերոնը (Sarai Núñez Cerón) և Ազգային գործողություն կուսակցության (PAN) միջազգային հարաբերությունների քարտուղար Մարիա Գոմես դել Կամպո Գուրսան (Mariana Gómez del Campo Gurza)։

Հանդիպման ընթացքում կողմերը մտքեր փոխանակեցին երկկողմ հարաբերությունների զարգացմանն առնչվող հարցերի շուրջ։ Այդ համատեքստում կարևորվեց միջխորհրդարանական համագործակցության զարգացումը, բարեկամության պատգամավորական խմբերի դերը և բարձրաստիճան փոխայցերի իրականացումը։ Դեսպան Այվազյանը վերահաստատեց հայկական կողմի հանձնառությունը խորացնելու Մեքսիկայի օրենսդիրների հետ արդյունավետ փոխգործակցությունը։

Լաուրա Ռոխասը վերահաստատեց օրենսդիր մարմնի շահագրգռվածությունը Հայաստանի Ազգային ժողովի հետ կապերի սերտացման առումով` խոստանալով աջակցություն ցուցաբերել դրանց կյանքի կոչման գործում:

Պայմանավորվածություն ձեռք բերվեց շարունակել շփումները միջխորհրդարանական փոխգործակցության օրակարգը զարգացնելու ուղղությամբ»,- նշված է հաղորդագրության մեջ։