Արցախը կաշկանդված չէ իր տարածքներն իր հայրենակիցներով բնակեցնելու հարցում

ԵԱՀԿ-ում Ադրբեջանի առաքելության նոտայի հետ կապված պաշտոնական Ստեփանակերտի արձագանքը, մեղմ ասած, չընկալվեց Հայաստանում։ Մասնավորապես, հայ ակտիվ հասարակությունը մեղադրեց ԼՂՀ իշխանություններին՝ ավելորդ զգուշավորության ու անհամարձակության մեջ։ Հիշեցնենք՝ ի պատասխան ադրբեջանական մեղադրանքի, թե ղարաբաղյան իշխանությունները շարունակում են ԼՂՀ տարածքների վերաբնակեցումը, ԼՂՀ ԱԳՆ-ն հայտարարել էր, թե դա «հիմնազուրկ ապատեղեկատվություն է», թեև նկատել էր տվել, որ դա (բնակեցումը) ԼՂՀ ինքնիշխան իրավունքն է։ Անմիջապես հանրային քննարկումներում, ի մասնավորի՝ սոցցանցերում հարց հնչեց, թե ինչու են ԼՂՀ իշխանությունները խուսափում հանձն առնել, որ, այո, բնակեցնում են։ Թեև հասկանալի է՝ դիվանագիտության մեջ քիչ բան է հանրային պարզաբանման ենթակա, սակայն, այդուհանդերձ, Lurer.com-ը զրուցեց ԼՂՀ նախագահի մամուլի խոսնակ Դավիթ Բաբայանի հետ, հատկապես հաշվի առնելով, որ ԼՂՀ-ից պաշտոնական հակասական հայտարարություններ էին հնչել. ԱԳՆ-ն հերքել, իսկ ԼՂՀ վարչապետը հաստատել էր մասնավորապես սիրիահայերի պարագայում վերջիններիս հյուրընկալելու ԼՂՀ պատրաստակամությունը։

Դավիթ Բաբայանը ևս շեշտեց, որ ԼՂՀ-ն ինքնիշխան պետություն է և կարող է տնօրինել իր տարածքն ինչպես ցանկանում է և այդ առումով մեծ աշխատանքներ է տանում իր ողջ տարածքում (ենթակառուցվածքների, գյուղատնտնեսական աշխատանքների և այլնի առումներով)։ «Ինչ վերաբերում է սիրիահայերին ապաստան տրամադրելուն, ապա, այո, մենք վերահաստատում ենք մեր պատրաստակամությունը՝ օգնել մեր ազգակիցներին նրանց կողմից նման ցանկության դեպքում, և դա ոչ թե միտումնավոր քաղաքականություն է, այլ՝ հումանիտար քայլ, ազգային պարտավորություն»։ Նա խորհուրդ տվեց չմոռանալ, որ Ադրբեջանը վաղուց և լայնամասշտաբ բնակեցրել է Շահումյանի, Գետաշենի և հյուսիսային մյուս տարածքները, որոնք, ի տարբերություն ԼՂՀ տարածքների, որևէ դիտարկման չեն ենթարկվել ԵԱՀԿ-ի կողմից, որովհետև Ադրբեջանն իր համաձայնությունը համառորեն չի տալիս։ «Եվ այսքանից հետո դեռ Ադրբեջանն է նոտա տարածում. Ի՞նչ է դա, եթե ոչ իրավիճակն ապակայունացնելու հերթական փորձ։ Ի՞նչ է՝ չասեի՞նք դա։ Եվ վերջապես, ԼՂՀ-ն անգամ միջազգային որևէ պայմանավորվածություն չունի՝ իր տարածքները չբնակեցնելու մասին, իսկ Ադրբեջանն իր այս նոտայով պարզապես շարունակում է հայերի հանդեպ իր ցեղասպան քաղաքականությունը՝ այս անգամ փորձելով խոչընդոտել հումանիտար աղետից տուժած սիրիահայերի՝ Արցախում հնարավոր հանգրվանումը»։

Նանե Մակուչյան