Զավեշտ ու լեզվի սայթաքում. ինչո՞վ աչքի ընկավ հեղափոխական նախարարի պաշտոնավարումը

Վերլուծական 18 Դեկտեմբեր, 2019 16:30

Շարունակելով ներկայացնել Նիկոլ Փաշինյանի կաբինետի անդամների պաշտոնավարման ընթացքում հնչեցրած մտքի գոհարները, այսօր անդրադառնանք նախկինում կապի և տրանսպորտի, իսկ այժմ արդեն՝ բարձր տեխնոլոգիական արդյունաբերության նախարար Հակոբ Արշակյանին: Ի պատիվ վերջինիս` պետք է նշենք, որ նա խուսափել է հայտնվել բացահայտ սկանդալային պատմությունների կիզակետում, սակայն, այնուամենայնիվ, նախարարը մի քանի անգամ հայտնվել է հանրության ուշադրության կենտրոնում կապված իր այս կամ այն հայտարարության հետ: Օրինակ, հենց Արշակյանին է պատկանում այն միտքը, որը վերաբերվում էր տեղի ունեցող կրճատումներին նախարարի վերաբերմունքին: Արդյոք բացասակա՞ն հետեւանք է, երբ որ մարդ ոչինչ չի անում եւ պետական բյուջեից ստանում է աշխատավարձ, այդ մարդուն աշխատանք գտնելու հնարավորություն տալը։ Այսինքն, ստացվում է, որ, ըստ նախարարի, մարդկանց կրճատելը և աշխատանքից զրկելը նրան աշխատանք գտնելու հնարավորություն է տալիս:

Բավական զավեշտալի իրավիճակում հայտնվեց նախարարը այն բանից հետո, երբ քաղաքացիների հետ հանդիպման ժամանակ, անդրադառնալով աջ ղեկով մեքենաներին հայտարարեց, որ համապատասխան օրենքը ընդունվել է սույն թվականի փետրվարի 31-ին է: Իհարկե, լեզվի սայթաքումից որևէ մեկը ապահովագրված չէ, սակայն պետք է փաստել, որ նախարարի այս հայտարարությունը դեռ երկար քննարկվեց հատկապես սոցիալական ցանցերի տիրույթում, դառնալով մեմ:

2018-ի հունվարից մինչեւ մայիս ժամանակահատվածում Արշակյանը «Արաքսիս Ինժեներինգ» ընկերության հիմնադիր-գործադիր տնօրենն էր: Արշակյանի նշանակումից հետո այս ՍՊԸ-ի հետ կապված սոցիալական մեդիայում եւ որոշ կայքերում լուրեր տարածվեցին, թե այն առնչություն ունի Կառավարության հավանությանն արժանացած ծրագրերից մեկի՝ «Ինժեներական քաղաք»-ի հետ, մասնավորապես, թե իբր Արշակյանի ՍՊԸ-ն եղել է միլիոնավոր դոլարներ արժեցող այս ծրագրի շահառուն։ Արշակյանը, իհարկե, հերքեց այդ տեղեկատվությունը:

Մամուլում քննարկվում էին նաև նախարարի հաճախակի գործուղումները և այն, թե ինչ է գործնականում դա տալիս ոլորտի զարգացման տեսանկյունից: Նույն մամուլը անդրադարձել էր նաև նրան, որ ՏՏ ոլորտում համաշխարհային ներդրման համար Հայաստանի Հանրապետության պետական մրցանակի դափնեկիր է դարձել «Նեյշնլ Ինսթրումենթս» (National Instruments) ընկերության համահիմնադիր Ջեյմս Թրուշարդը, ով Հակոբ Արշակյանի նախկին գործատուն էր:

Ընդհանուր առմամբ, պետք է փաստել, որ Հակոբ Արշակյանի պաշտոնավարումը աչքի չի ընկել լուրջ սկանդալներով, ինչը Նոր Հայաստանի պաշտոնյաների դեպքում արդեն իսկ դրական արձանագրում է: Սակայն զավեշտալի իրավիճակիների պակաս, ինչպես ասում են, չի զգացվել...