Հիրոսիմայում նշել են ողբերգության 67-րդ տարելիցը

Ճապոնական լրատվամիջոցների տեղեկացմամբ, մոտ 50 հազար մարդ, այդ թվում պայթյունից տուժածներ, հավաքվել են Հիրոսիմայի Հիշատակի այգում, որտեղ տեղի է ունեցել սգո արարողություն: Նրանում իր մասնակցությունն է ունեցել նաև Հիրոսիմայի վրա միջուկային զենք բաց թողնելու հրամանն արձակած ԱՄՆ նախագահ Հարի Թրումանի թոռը' 55-ամյա Քլիֆթոն Թրուման Դենիելը:

Ավելի վաղ տեղեկացվել էր, որ արարողությանը կմասնակցի նաեւ Հայաստանից մեկնած պատվիրակություն: Պատվիրակության կազմում ընդգրկված են հայ-ճապոնական գիտաուսումնական, մշակութային «Հիկարի» կենտրոնի ղեկավար Կարինե Փիլիպոսյանը, Հենրիկ Իգիթյանի անվան Գեղագիտության ազգային կենտրոնի երկու փոխնախագահները: Նշենք, որ հենց «Հիկարի» կենտրոնի որոշմամբ է մի քանի տարի առաջ սկիզբ դրվել հիշատակման օրը Հիրոսիմայի եւ Նագասակիի տուժածներին լուսամփոփներ եւ կռունկներ հղելու բարի ավանդույթը: Այս անգամ կենտրոնի աշակերտները Ճապոնիային են հանձնել ողբերգական տարելիցի թվին համապատասխան 67 լուսամփոփ եւ 1000 կռունկ:

1958 թ-ին Հիրոսիմայի Խաղաղության այգում կանգնեցվել էր միջուկային ռումբի հազարավոր զոհերից մեկի` ճապոնացի աղջնակ Սադակո Սասակիի արձանը:

News.am