Արարատ Միրզոյանը երեխաների որդեգրման և օրգանների հնարավոր վաճառքի վտանգների մասին վաղուց էր ասել

Այս օրերին մեծ աղմուկ է բարձրացել երեխաների որդեգրման և նրանց օրգանները վաճառելու աղմկահարույց լուրերի հետ կապված։ Սակայն հիշենք դեռևս տարեսկզբին տեղի ունեցած մի դրվագ, երբ ներկայիս ԱԺ նախագահ Արարատ Միրզոյանը բարձրաձայնել էր այդ մասին և ընդգծել, որ ոլորտը լրջագույն վերահսկողության կարիք ունի։ Հունվարի 10-ին, Կառավարության նիստին այն ժամանակ Արդարադատության նախարարի պաշտոնակատար Արտակ Զեյնալյանը ներկայացրել էր երեխաների որդեգրման նախագիծ, որը բուռն քննարկման առարկա էր դարձել։ Այն ժամանակ առաջին փոխվարչապետի պաշտոնը զբաղեցնող Արարատ Միրզոյանը նշել էր, որ որդեգրման հարցում խոսքը միայն կոռուպցիայի վտանգի մասին չէ, կան ավելի մեծ վտանգներ․ «Գործ ունենք մաֆիայի հետ։ Գումարները, որի մասին խոսում են, որոնք սկսվում են ծննդատնից ու շարունակվում, միայն այսբերգի գագաթն է, շատ ավելի ցավալի իրավիճակ ունենք, մասնավորապես, երեխաների օրգանների վաճառքի, այդ թվում՝ արտասահման որդեգրվող երեխաների»,- նշել էր նա։

Վարչապետ Նիկոլ Փաշինյանի հարցին ի պատասխան՝ Միրզոյանն արձագանքել էր, որ թեև հստակ փաստեր չկան, սակայն երևույթը տարածված է ողջ աշխարհում և երբեմն որոշ կեղծ կամ ոչ կեղծ մարդիկ որդեգրում են տարբեր երկրներից երեխաներ և հետագայում նրանք կարող են զրկվել իրենց մարմնի ինչ-որ մասից։  Սակայն նկատենք, որ ԱԱԾ նախկին տնօրեն Արթուր Վանեցյանը նշել էր, որ մատնանշած խնդրի վերաբերյալ երբևէ տեղեկատվություն չեն ստացել։ Գլխավոր դատախազ Արթուր Դավթյանն ասել էր, որ նման քրեական գործեր չեն ստացել։ Սակայն, ամիսներ առաջ երեխային կորցրած Հայկուհի Խաչատրյանը նկատում է՝ «իրավապահ համակարգում կան մարդիկ, որոնք օգնել են պարտակել հանցագործությունները»։

Ստացվում է՝ մեզ մոտ մի բանի մասին խոսում, անցնում են, մինչև մեկը չի որոշում մինչև վերջ գնալ։

Նշենք, որ երեկ ծնողներից երեխային ապօրինի բաժանելու կասկածանքով ձերբակալվեցին «Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ»-ի տնօրեն Ռազմիկ Աբրահամյանը, փոխտնօրեն Արշակ Ջերջերյանը, «Երևանի մանկան տուն» ՊՈԱԿ-ի տնօրեն Լիանա Կարապետյանը: Այն, որ Ռազմիկ Աբրահամյանի անունը բազմիցս է կապվել երեխաների, նրանց օրգանների վաճառքի հետ, նորություն չէ, սակայն խնդրին սկսեցին ուշադրություն դարձնել հատկապես սեպտեմբեր ամսին, երբ ծննդաբերած և երեխային կորցրած Հայկուհի Խաչատրյանը պնդում էր, որ իրենց հայտնել են, թե երեխան մահածին է եղել ու չնայած իրենց ջանքերին այդպես էլ ցույց չեն տվել երեխայի մարմինը։ Վերջինս բարձրաձայնում էր, որ իր երեխային կամ մարմնի օրգանները վաճառել են, քանի որ երեխայի մարմինը ցույց են տվել միայն սև տոպրակի մեջ, այնուհետև տարրաների մեջ և ոչ մի մասնագետ չի բացատրել՝ դրանք երեխայի մարմնի ո՞ր մասերն են։

Ի դեպ, Ռազմիկ Աբրահամյանի ձերբակալությունից հետո նրան ճանաչող կանայք գոհունակություն էին հայտնում և միաբերան դժգոհում այս մարդու ծառայություններից։ Ավելին, հայտնվեցին բազմաթիվ կանայք իրենց տարբեր հուզիչ պատմություններով, որոնք առնչվում էին նորից այն ծննդատան հետ, որտեղ աշխատում և գործում էր Ռազմիկ Աբրահամյանը՝ «թիվ մեկ  գլխավոր մանկաբարձ-գինեկոլոգը Հայաստանում»։ 

Սակայն, հարկ է նշել՝ չպետք է մոռանանք նաև մարդու անմեղության կանխավարկածի մասին և սպասել իրավապահ մարմինների ուսումնասիրությանը, երբ կապացուցվի՝ ով է մեղավորը, և ով է զոհը։

Սոնա Հարությունյան

Տեսանյութը՝ civilnet.am—ի