Խորհրդակցություն ԱԻՆ-ում

Օգոստոսի 6-ին ՀՀ արտակարգ իրավիճակների նախարարությունում տեղի է ունեցել հերթական ամենշաբաթյա խորհրդակցությունը, որը վարում էր նախարար Արմեն Երիցյանը։

ՓԾ տնօրեն, գեներալ-մայոր Ս. Ազարյանը նախարարին զեկուցեց անցած շաբաթվա ընթացքում հանրապետության տարածքում գրանցված արտակարգ պատահարների, սեպտեմբերին Վրաստանում կայանալիք ՆԱՏՕ-ի «Ջորջիա 2012» վարժանքի նախապատրաստական և քաղպաշտպանության պլանների մշակման աշխատանքների մասին։

ԱԻ նախարարը հանձնարարեց քաղպաշտպանության պլաններում ուշադրություն դարձնել հանրային իրազեկման և վաղ ազդարարման խնդիրներին։

ՀՀ ԱԻՆ ՍՊԱԾ գործակալության պետ Հ. Պետրոսյանը զեկուցեց, որ փրկարար ծառայության հետ համատեղ քննարկվել է Գյումրիում սեյսմիկ տատանումները գրանցող ճապոնական համակարգը տեղադրելու խնդիրը, իսկ Գառնիի դիտարանի զարգացման ծրագիրը մշակվել և քննարկման համար ուղարկվել է շահագրգիռ կազմակերպություններին։

Խորհրդակցության ընթացքում նախարար Ա. Երիցյանին զեկուցեցին նաև, որ շուտով կավարտվի ԱԻՆ պոլիկլինիկայի շինարարությունը, որը սպասարկելու է համակարգի աշխատակիցներին և նրանց ընտանիքի անդամներին։

Տեղեկատվական ապահովման և ազդարարման կենտրոնի տնօրեն Ա. Ներսիսյանը տեղեկացրեց, որ Երևանի մետրոպոլիտենի կայարաններում տեղադրված տեսախցիկներն արդեն միացվել են ԱԻՆ ճգնաժամային կառավարման կենտրոնին, ինչը հնարավորություն է տալիս հետևել այնտեղ կատարվող իրադարձություններին և որևէ պատահարի դեպքում արագ արձագանքել։

ԱԻ նախարարի խորհրդական Ա. Հակոբյանի գլխավորած հանձնաժողովը, ստուգելով նորակառույց շարժական հակակարկտային կայանը, եզրակացություն է տվել, որ այն կառուցված է բոլոր նորմերին համապատասխան ու պատրաստ շահագործման։