ՄԱԿ-ի բարձրաստիճան ներկայացուցիչը ԱԻ նախարարի հյուրն էր

Այսօր ՀՀ ԱԻ նախարար Արմեն Երիցյանն ընդունել է ՄԱԿ-ի Հյուսիս-արևելյան գրասենյակի տնօրեն, Գլոբալ ուսուցման և կրթության ինստիտուտի ղեկավար Գլեն Դոլչեմասկոլոյին։ Ըստ էության' նա ՀՀ ԱՌՆ ազգային պլատֆորմի (ԱՌՆԱՊ) առաջին բարձրաստիճան հյուրն է Հայաստանում։

Գ. Դոլչեմասկոլոյի այցն ԱՌՆԱՊ-ի և իր ղեկավարած գրասենյակի միջև համագործակցության առաջին քայլն է։

ԱԻ նախարար Ա. Երիցյանը, ողջունելով հյուրին, հանգամանալից ներկայացրեց նախարարության անցած ճանապարհը, կառուցվածքը և առաքելությունը։

- Աղետների ռիսկի նվազեցումը մշտապես գտնվում է մեր հանրապետության նախագահի ուշադրության կենտրոնում։ Մեր երկիրը գնում է աղետակայուն պետություն կառուցելու ճանապարհով, և տարածաշրջանի միակ երկիրն է, որն ունի աղետների ռիսկի նվազեցման ազգային ռազմավարություն։ ԱԻ նախարարությունը համակարգում է այդ ուղղությամբ տարվող բոլոր աշխատանքները։ Չնայած ՀՀ 18 նախարարությունների շարքում ԱԻ նախարարությունն ամենաերիտասարդն է, որը ստեղծվել է 2008 թվականին, սակայն ուժեղ թիմի և հանձին ՄԱԿ-ի' հավատարիմ գործընկերների օգնությամբ, արագ զարգանում է ու շարժվում առաջ,- ասաց Ա. Երիցյանը։

Նախարարը հյուրին պատմեց նաև փրկարարական դեսանտային ջոկատի և «911» ծառայության մասին, ինչպես նաև ներկայացրեց սահմանափակ հնարավորություններով մարդկանց ԱԻՆ ճգնաժամային կառավարման կենտրոնում աշխատանքի ընդունելու ծրագիրը։

Գլեն Դոլչեմասկոլոն շնորհակալություն հայտնեց ԱԻ նախարարին ընդունելության համար' նշելով, որ առաջին անգամ է այցելում Հայաստան' չնայած մինչ այս շատ առիթներ է ունեցել շփվելու մեր հայրենակիցների հետ։

- Իմ այցելության հիմնական նպատակներն են' ծանոթանալ ձեր ձեռքբերումներին և վերցնել դրական փորձը, հասկանալ, թե ինչպես կարող ենք աջակցել ԱԻՆ առաջխաղացմանը' ԱՌՆԱՊ-ի և Ճգնաժամային կառավարման ակադեմիայի օգնությամբ։ Ուրախ եմ տեսնել, որ այստեղ կա հզոր քաղաքական կամք, որի շնորհիվ այսպիսի նվաճումներ ունեք։ Չափազանց տպավորված եմ, քանի որ առաջին անգամ եմ լսում, որ հաշմանդամներին ցանկանում են աշխատանքի ընդունել նման համակարգում։ Իսկ ԱՌՆ ազգային ռազմավարության առկայությունը ցույց է տալիս, թե որքան շատ է այս ոլորտը կարևորվում։

Պարոն Դոլչեմասկոլոյին հետաքրքրում էր նաև ԱԻ նախարարի տեսակետը Հյոգոյի գործողությունների ծրագրի շարունակության վերաբերյալ, քանի որ այն 2015 թ. ավարտվում է։ Ա. Երիցյանն ասաց, որ վերջերս Ճապոնիա կատարած այցի ժամանակ նա արդեն անդրադարձել է այդ հարցին և առաջարկել ստեղծել աղետների վերաբերյալ տվյալների կուտակման ու վերլուծության համաշխարհային մեծ բազա, որը թույլ կտա ավելի գործնական մոտեցում ցուցաբերել աղետների ռիսկի նվազեցման խնդիրներին։

ՄԱԿ-ի ներկայացուցիչ բարձրաստիճան հյուրը խոստացավ Ժնև վերադառնալուն պես այնտեղ ներկայացնել ԱԻ նախարարի առաջարկությունը։ Նա նաև Ա. Երիցյանին հրավիրեց մասնակցելու 2013 թ. ամռանը կայանալիք Գլոբալ Պլատֆորմի հանդիպմանը և կիսվել օգտակար փորձով։

Այցի վերջում Գլեն Դոլչեմասկոլոն եղավ ԱԻՆ ճգնաժամային կառավարման կենտրոնում՝ ծանոթանալով դրա հնարավորություններին ու գործառույթներին։