Գրքի միջազգային տոնավաճառ. հայկական պատվիրակության կազմում ընդգրկվելու մրցույթ

2012 թ. հոկտեմբերի 10-14-ը Գերմանիայի Մայնի Ֆրանկֆուրտ քաղաքում կանցկացվի գրքի միջազգային 64-րդ տոնավաճառը, որին իրենց մասնակցությունը կբերեն աշխարհի 100 երկրի շուրջ 7000 ցուցադրող կազմակերպություններ:

Ֆրանկֆուրտի միջազգային տոնավաճառին Հայաստանի պատվիրակության կազմում ընդգրկվելու նպատակով՝ հայ հրատարակիչները, գրական գործակալները, գրողները, գրականագետները, գրաքննադատները պետք է ներկայացնեն մասնակցության վերաբերյալ առաջարկություններ, իսկ կազմակերպությունները` մասնակցության հայտեր:

Ցուցահանդեսին կարող են մասնակցել իրավաբանական և ֆիզիկական անձինք, ովքեր նպատակ ունեն համագործակցելու արտերկրի հրատարակչությունների հետ, ինչպես նաև ներկայացնելու իրենց հրատարակած գրքերը և հեղինակած ստեղծագործությունները:

Մասնակցության վերաբերյալ առաջարկություններն ու հայտերն անհրաժեշտ է ներկայացնել մինչև ս. թ. սեպտեմբերի 10-ը ՀՀ մշակույթի նախարարության «Գրքի և հրատարակչական գործի կենտրոն» ՊՈԱԿ: Տեղեկատվությունն ուղարկել [email protected] էլ. հասցեով կամ Իսահակյան 28, «Գրքի և հրատարակչական գործի կենտրոն» ՊՈԱԿ: