«Չորրորդ ինքնիշխանություն». Անակնկալ ապամոնտաժում

««Արամի խաչմերուկ» շարժման մասնակիցներին երեկ մեծ անակնկալ էր սպասվում՝ թիվ 30 շենքի ցանկապատը ապամոնտաժել էին։ Նախօրեին շարժման մասնակիցները հայտարարություն էին տարածել, թե Արամի թիվ 30 շենքը ցանկապատել են։

«Երեկ մենք մինչև ժամը 19.30-ը շենքի մոտ էինք, պարիսպները տեղում էին, իսկ այսօր անակնկալի եկանք, երբ տեսանք, որ դրանք էլ չկան։ Չեմ կարող ասել, գիշերն են հանել, թե առավոտյան, բայց շատ ուրախ ենք, որ կարողացանք ինչ–որ բանի հասնել»,- «Ա1+»-ին տեղեկացրել է «Արամի խաչմերուկ» շարժման ակտիվիստ Արփինե Զարգարյանը։

Շարժման մասնակիցները շենքի պատերին «Այս շենքը քանդողը բարբարոս է», «Մի վերացրեք պատմությունը, սա իմ տունն է», «Թույլ չենք տալիս քանդել», «Հինը քանդելով, նորը անհիմն է, պահպանենք մեր արժեքները» բովանդակությամբ պաստառներ էին փակցրել՝ ցանկանալով բոլորի ուշադրությունը սևեռել այստեղ տիրող անարդարությանը։

Ակտիվիստները վստահեցրել են, որ ամեն օր գալու են և շենքի մոտ հերթապահելու են այնքան ժամանակ, մինչև խնդրին լուծում տրվի»՝ հայտնում է «Չորրորդ ինքնիշխանություն»-ը։