Այն, ինչի մասին չխոսեց մարզպետ Սարգսյանը

Արարատի մարզպետ Գարիկ Սարգսյանը այսօր հրավիրված ասուլիսի ընթացքում որոշել էր ամփոփել անցած մեկ տարին: Թվում էր, թե հեղափոխական մարզպետը րոպե առաջ պետք է սկսեր թվարկել այն բոլոր ձեռքբերումները, որոնք մարզը գրանցել է իր կառավարման ընթացքում, սակայն Սարգսյանը որոշեց այստեղ էլ զարմացնել ներկաներին և ընդհանրապես չխոսել կատարված աշխատանքի, տված խոստումների մասին: Փոխարենը՝ մարզպետը հպարտացավ մարզում ծնելիության մակարդակի աճով, ճիշտ է, համեստություն արեց և հրաժարվեց այդ պատմական արդյունքը ուղղակիորեն կապել մարզպետարանի փայլուն ու տքնաջան աշխատանքի հետ: Մյուս կողմից էլ Սարգսյանը ավետեց դարի ներդրումային ծրագրի իրականացման մասին: Ընդ որում, այստեղ որևէ չափազանցություն չկա, ինքը՝ մարզպետը, հայտարարեց, որ գյուղմթերքի շուկայի ստեղծման համար ակնկալվում է 4,5 միլիարդ դոլարի ներդրում:

Հասկանալի է, իհարկե, որ մարզպետը կրկին շփոթել է թվերը, քանի որ նման գումարով ոչ թե գյուղմթերքի շուկա, այլ երկու նոր Արարատի մարզ կարելի է կառուցել: Ինչևէ, Սարգսյանը չցանկացավ խոսել նաև չարչրկված կոկորդիլոսաբուծարանի բացման մասին: Ի դեպ, մարզպետի այս նոու-հաուն նույնպես գրվեց սառույցին, չնայած ինքը՝ Սարգսյանը, դեռ որոշակի հույսեր փայփայում է, որ ծրագիրը կարող է իրականություն դառնալ: Ցավալի է, իհարկե, որ մարզպետը չցանկացավ խոսել իր տված և չկատարված խոստումների մասին, քանի որ այս ասուլիսը պետք է լիներ հենց այդ խոստումների կատարման արդյունքների ամփոփման շուրջ և ոչ թե բողոքների: Մարզպետը բողոքեց բոլորից՝ մամուլից, հին իշխանություններից: Ի դեպ, վերջիններիս մասին. Սարգսյանը խոստացել էր բացահայտել նախկինների վայրագությունները, սակայն, մինչ օրս այս առումով որևէ տեղաշարժ չի նկատվել, հասարակությունն էլ դեռ սպասում է Սարգսյանի ցնցող բացահայտումներին:

Բազմիցս էր խոսվել Արարատի մարզում, այսպես կոչված, ջրի մաֆիայի գոյության մասին՝ այդ մաֆիայի ողնաշարը մարզպետը ջարդե՞լ է, լուծե՞լ է գոնե մասամբ մարզի թիվ մեկ՝ ոռոգման խնդիրը: Եվ եթե ըստ վերջինիս՝ մինչ օրս մարզում առկա են հեղափոխությանը դիմադրող օջախներ՝ ո՞վ է խանգարում իրեն կոտրել այդ դիմադրությունը: Սրանք այն հարցերն են, որոնց պատասխանները մարզպետ Սարգսյանը այդպես էլ չտվեց…