Գագիկ Բեգլարյանը՝ մանկական երկաթուղում

Հայաստանի Հանրապետության տրանսպորտի եւ կապի նախարար Գագիկ Բեգլարյանն օգոստոսի 5-ին Երկաթուղայինների օրվա կապակցությամբ այցելել է Երեւանի Մանկական երկաթուղի: Նախարարը «Հարավկովկասյան երկաթուղի» ընկերության գլխավոր տնօրեն Վիկտոր Ռեբեցի ուղեկցությամբ շրջել է երկաթուղու տարածքում, ծանոթացել կայարանների, շարժակազմի, գծերի նորոգման եւ արդիականացման աշխատանքներին:

Երկաթուղայիններին նվիրված հանդիսավոր միջոցառման ժամանակ Գագիկ Բեգլարյանը նշել է, որ Երկաթուղային տրանսպորտը Հայաստանի տնտեսության կայուն զարգացման կարեւորագույն ճյուղերից է:« Զգալի ներդրումներ են կատարվել Հայաստանի երկաթուղային ենթակառուցվածքների զարգացման, փոխադրումների ծավալների, գնացքների երթեւեկության անվտանգության բարձրացման ուղղությամբ: «Հարավկովկասյան երկաթուղի»-ն ամբողջությամբ կատարում է ներդրումային ծրագրով նախատեսված իր պարտավորությունները: Ընկերության իրականացրած կարեւորագույն աշխատանքների թվում են «Զամառլու» երկաթուղային կամրջի կառուցումը, «ՀԿԵ»-ում տրանսպորտային ծառայությունների կենտրոնի բացումը, միջազգային հաղորդակցության ուղեւորագնացքների վաճառքի ավտոմատացված համակարգի ներդրումը»,-նշել է Գագիկ Բեգլարյանը: Նախարարն ընդգծել է, որ զգալիորեն աճել են ուղեւորափոխադրումները, որոնք իրականացվող բարեփոխումների շնորհիվ կունենան շարունակական բնույթ:
Նախատեսվում է իրականցնել նաեւ մի շարք նախագծեր, որոնցից է դեպի «Զվարթնոց» միջազգային օդանավակայան երկաթուղային գծի կառուցումը: Անհրաժեշտ է հետեւողականորեն շարունակել աշխատանքներն այդ ուղղությամբ: ՀՀ տրանսպորտի եւ կապի նախարար Գագիկ Բեգլարյանը նշել է, որ «ՀԿԵ»-ի կողմից նախարարության համաձայնեցմանը ներկայացված 2012թ-ի ներդրումների հասցեական եւ 2012-14թթ-ի եռամյա ներդումային ծախսերի ծրագրերը վստահություն են ներշնչում, որոլորտում իրականացվող բարեփոխումները միեւնույն թափով կիրագործվեն առաջիկա տարիներին եւս:

Նախարարը համոզմունք է հայտնել, որ միասնական ջանքերի շնորհիվ ապագայում կհաջողվի հասնել ցանկալի նպատակի, ունենալ միջազգային չափանիշներին համապատասխան ժամանակակից երկաթուղի:

Երկաթուղայինի օրվա կապակցությամբ շնորհավորական ուղերձ էր հղել նաեւ Հայաստանի Հանրապետության վարչապետ Տիգրան Սարգսյանը:
Միջոցառմանը ներկա ՀՀ ԱԺ փոխնախագահ Հերմինե Նաղդալյանը նկատել է, որ երկաթուղայինների դերն ու նշանակությունը Հայաստանի համար անգերազանցելի է, իսկ ՀԿԵ-ի ունեցած աշխատանքային հաջողությունները պետք է բազմապատկել:

Երկաթուղայինի օրվա կապակցությամբ ՀՀ տրանսպորտի եւ կապի նախարար Գագիկ Բեգլարյանի հրամանով՝ երկաթուղային համակարգի զարգացման գործում ներդրում ունենալու, ծառայողական պարտականությունները գերազանց կատարելու համար «Հարավկովկասյան երկաթուղի» ՓԲԸ-ի մի շարք աշխատակիցներ պարգեւատրվել են պատվոգրերով: