Փոխվարչապետն ընդունեց Համաշխարհային սկաուտական շարժման գլխավոր քարտուղարին

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Համաշխարհային սկաուտական շարժման գլխավոր քարտուղար Լյուկ Պանիսոյին, ով Հայաստան է այցելել Հայկական սկաուտության հիմնադրման 100-ամյակին նվիրված միջոցառումներին մասնակցելու նպատակով: Հանդիպմանը ներկա էին նաեւ համաշխարհային եւ տարածաշրջանային սկաուտական շարժման պատվիրակության անդամներ:

Ողջունելով հյուրերին՝ փոխվարչապետը կարեւորեց երիտասարդական կազմակերպությունների, մասնավորապես՝ հայկական սկաուտական շարժման դերակատարությունը հայ երիտասարդների հայեցի դաստիարակության եւ Սփյուռքում հայապահպանության գործում, նշելով, որ սկաուտական կազմակերպությունն այն կառույցներից մեկն է, որը կապում է Սփյուռքի հայկական համայնքները Հայաստանի հետ: Նա վստահություն հայտնեց, որ հայկական սկաուտական շարժումն իր ուրույն տեղն ունի նաեւ Համաշխարհային սկաուտական շարժման մեջ:

Ա. Գեւորգյանը շնորհավորեց Հայկական սկաուտության հիմնադրման 100-ամյակի կապակցությամբ եւ հաջողություններ մաղթեց սկաուտական շարժման ընդլայնման աշխատանքներում՝ ընդգծելով, որ ՀՀ կառավարությունը պատրաստ է աջակցել կազմակերպությանը՝ նոր ծրագրերի եւ գաղափարների իրականացման հարցում:

Զրուցակիցներն անդրադարձան հոբելյանական միջոցառումներին, համահայկական սկաուտական բանակումի աշխատանքներին:
Ա. Գեւորգյանը ողջունեց համահայկական նման միջոցառումների անցկացումը, ընդգծելով, որ համահայկական ներուժի օգտագործման առումով այս միջոցառումները շփումների համահայկական կարեւոր պլատֆորմ են ստեղծում:

Համաշխարհային սկաուտական շարժման գլխավոր քարտուղար Լյուկ Պանիսոն շնորհակալություն հայտնեց ընդունելության եւ աջակցության պատրաստակամության համար: