Նոր իշխանությունների սկանդալային դեմքերը. մարզպետներ

Վերլուծական 21 Դեկտեմբեր, 2019 16:30

Նոր Հայաստանի պաշտոնյաներն, ընտրվելով կամ նշանակվելով իրենց պաշտոններում, մեկը մյուսի հետևից նախկիններին վերաբերվող սկանդալային բացահայտումներ էին խոստանում: Ժամանակը անցնում է, սկանդալային բացահայտումների և ընդհանրապես՝ սկանդալային պատմությունների պակաս չկա, սակայն այդ պատմությունների կիզակետում ոչ թե նախկիններն են, այլ հենց ներկայիս իշխանավորները:

Դիցուք, մամուլում գրվում էր այն մասին, որ Արմավիրի մարզպետ Համբարձում Մաթևոսյանը դեռևս 26 տարեկան է, սակայն անհայտ պատճառով այդպես էլ պետության նկատմամբ իր սահմանադրական պարտքը չկատարելով և չծառայելով ՀՀ զինված ուժերում, հայտնվել է ՀՀ Արմավիրի մարզպետի աթոռին: Իսկ, թե ինչու չի անցել զինվորական ծառայության և ինչու է մարզպետարանի կայքում նրա պաշտոնական էջում նշված, որ զինապարտ չէ, պատկան մարմինները, կարծես թե, այդպես էլ չպարզեցին: Նույն մամուլի տեղեկությունների համաձայն` Արմավիրի մարզպետարանի հավաստի լրատուն հայտնել է, որ ելնելով իմքայլական պաշտոնյաների մոտ ճամպրուկային կարգավիճակից, Արմավիրի մարզպետ՝ Համբարձում Մաթեւոսյանը, խորհրդական՝ ՀՀԿ-ական Նվեր Պետրոսյանն ու մարզպետարանի Կրթության, մշակույթի եւ սպորտի վարչության պետ՝ Սոնյա Բուդաղյանը գնացել են աննախադեպ քայլի՝ պաշտոնի դիմաց, խոշոր գումար են վերցրել Բաղրամյանի դպրոցի նախկին տնօրեն՝ Շուշանիկ Ոսկանյանից, նրան խոստանալով Զվարթնոցի դպրոցի տնօրենի պաշտոնը: Մամուլում առկա մեկ այլ տեղեկության համաձայն էլ, մարզպետի անունը կապում էին գյուղնշանակության հողի վրա նոր շուկա կառուցելու թույլտվության հետ և պնդում էին, որ այդ թույլտվության հետևում կանգնած են Արմավիրի մարզպետ Համբարձում Մաթևոսյանը և փոխմարզպետ Կարեն Գրիգորյանը: Մարզպետը, սակայն, հերքել է այդ տեղեկությունները:

Հայկական մեդիայի ուշադրության կենտրոնից չի վրիպել նաև Արագածոտնի մարզպետ Դավիթ Գևորգյանը: Վերջինիս մասին գրում էին, որ հետաքրքիր նորամուծություն է արել՝ ամեն շաբաթ-կիրակի պարտադրում է մարզպետարանի աշխատակազմին իր անվամբ գործուղումներ ձևակերպել և «մեկնում» է մարզի համայքներ՝ դրա համար հանգստյան օրերին աշխատելու պատրվակով լրացուցիչ վարձատրվելով: Գրիգորյանը մեկ այլ տհաճ պատմության մեջ էլ է հայտնվել. ամիսներ առաջ ՀԷԿ-ի դեմ պայքարող Արագած գյուղի բնակիչները փակել էին ճանապարհը, իսկ երբ մարզպետը եկավ հանդարտեցնելու, էլ ավելի սրեց իրավիճակը և այդ ամենը վերածվեց լեզվակռվի, ինչը միանշանակ հարիր չէ պաշտոնատար անձի, այն էլ՝ Նոր Հայաստանում, որտեղ ամեն օր խոսում են փոխադարձ հարգանքից և քաղաքական նոր մշակույթ ձևավորելու անհրաժեշտությունից:

Ամիսներ առաջ էլ համացանցում տարածվեց տեղեկատվություն, որի համաձայն՝ Արագածոտնի մարզպետ Դավիթ Գևորգյանը չորս տարի առաջ ընկերների հետ մասնակցել է ՌԴ դեսպանատան դիմաց կազմակերպված բողոքի ակցիաներին: Բողոքի ակցիայի ժամանակ մասնակիցները փորձել են այրել ՌԴ դրոշը, իսկ երբ ոստիկանները փորձել են դա կանխել, Դավիթ Գևորգյանը դրոշը գցել է ոտքերի տակ և կոշիկները սրբել է վրան: Այս տեղեկատվությունը Դավիթ Գևորգյանը հերքել է՝ ասելով, որ տարածված տեղեկությունն իրականությանը չի համապատասխանում, և նա ՌԴ-ի նկատմամբ այդպիսի դիրքորոշում չունի և չի ունեցել: Լրատվամիջոցներին, սակայն, հաջողվեց պարզել, որ մարզպետի հետ տեղի ունեցած դրվագը իրականությանը համապատասխանում է: