ՀՖՖ-ում գրաքննություն է. Սուրեն Բաղդասարյանին չեն հավատարմագրել Մելիքբեկյանին քննադատելու պատճառով

Հայաստանի ֆուտբոլի ֆեդերացիան մերժել է ֆուտբոլային մեկնաբան Սուրեն Բաղդասարյանի հավատարմագրումը՝ դեկտեմբերի 23-ին կայանալիք ՀՖՖ նախագահի և գործկոմի անդամների ընտրություններին: ԼՈւՐԵՐ.com–ի թղթակիցը զրուցել է Սուրեն Բաղդասարյանի հետ, ով մանրամասն ներկայացրել է մերժման հիմքերը:

«Մարդիկ ընդեղ նստած ինչ ուզում անում են: Իմ մեյլին իմ հավատարմագրման հայտը մերժելու գրություն է եկել: Մեջբերում եմ բառացի՝

«Հարգելի գործընկեր, ձեր հավատարմագրումը ՀՖՖ արտահերթ ժողովի լուսաբանման համար չի հաստատվել՝ հաշվի առնելով վերջին շրջանում ՀՖՖ գործող ղեկավարության մասին ձեր հրապարակային անհարգալից ելույթները, ինչպես նաև ՀՖՖ կողմից կազմակերպված միջոցառումների բնականոն ընթացքի խաթարման փորձերը և դրանց ընթացքում ոչ պատշաճ վարքագծի դրսևորումը»»,- ասաց Բաղդասարյանը:

Նրա պնդմամբ՝ ինքը  վերջին ժամանակներում ընդամենը մեկ միջոցառման է մասնակցել:

«Դա դեկտեմբերի վեցին էր, երբ ներկայացնում էին  ՀՖՖ նախագահի թեկնածուների և գործկոմի անդամներին: Այդ օրը ես լրագրողի իրավունքով հարց եմ տվել՝ ասելով. «Արդյո՞ք զավեշտալի չէ, որ Մելիքբեկյանն, անցյալ տարի հենց Զվարթնոց ՖԱ-ի շնորհիվ դառնալով ՀՖՖ առաջին փոխնախագահ և գլխավոր քարտուղար, այսօր նրա նախաձեռնությամբ Զվարթնոցը, ինչպես ասում են, ֆեյք է որակվել: Արդյո՞ք Մելիքբեկյանը նույնպես ֆեյք է»,- սա է եղել իմ հարցը: Հետո շարունակում եմ հարց տալ. «Դուք Հանրապետական մարզադաշտը ֆեյք չեք որակել, չեք զրկել անդամությունից և ինքնին  այն մտնում է ֆեդերացիայի կառույցի մեջ, ֆինանսավորվում և ղեկավարվում է նրա կողմից: Սրանով դուք ապահովում եք ձեր օգտին ֆիկտիվ ձայները: Սա վկայում է, որ ի սկզբանե նախապատրաստվում եք կողմնակալ մոտեցումներով»: Իմ այս երկրորդ արդարացի հարցապնդումը նկատի ունենալով՝ նրանք հաջորդ նիստին կասեցրին Հանրապետական մարզադաշտի անդամակցությունը: Այս ամենը իրենք որակում են որպես միջոցառման խաթարում իմ կողմից»,- ասաց մեր զրուցակիցը:

Բաղդասարյանը, մերժումը ստանալուց հետո, դիմել է ՀՖՖ: Նրան պատասխանել է գլխավոր քարտուղարի տեղակալ Արթուր Ազարյանը և ասել, որ կանոնադրությունում կա կետ, ըստ որի՝ հնարավոր է լրագրողին զրկել հավատարմագրման իրավունքից:

«Չեն հավատարմագրում այն լրագրողներին, որոնց հարցերն ու հոդվածները հաճո չէ նրանց քիմքին: Մենք միակ տպագիր լրատվամիջոցն ենք, որ լուսաբանում, վերլուծում ու գնահատականներ է տալիս բոլոր հանդիպումների մասին: Եթե մենք չլինենք, վստահ եմ, որ ոչ մի կայք դա չի անելու, նրանք միայն հաշիվներն են գրում»,- նշեց Բաղդասարյանը:

Ֆուտբոլային մեկնաբանը իրեն չհավատարմագրելու ՀՖՖ որոշումը ապօրինություն համարեց և տեղեկացրեց, որ պատրաստվում է բաց նամակով դիմել վարչապետին. «Վարչապետն էլ լրագրող է եղել, կհասկանա դրությունը: Ես, հետագա զարգացումներից ելնելով, հնարավոր է դիմեմ նաև ՈՒԵՖԱ»:

Բաղդասարյանն, ի պատասխան մեր այն հարցի, թե ում է տեսնում նախագահի պաշտոնում, հստակ պատասխան չտվեց. «Ես այս քարոզարշավից դուրս եմ եկել մի պատճառով: Ես լավ եմ ճանաչում Մելիքբեկյանին և Նիկողոսյանին, ես պնդում եմ, որ այդպիսի մարդիկ իրավունք չունեն ղեկավարելու մեր ֆուտբոլը: Դա իրենք ապացուցել են այս մեկ տարվա ընթացքում, իրենք կործանել են մեր ֆուտբոլը: Եվ նույնիսկ եթե ընտրվեն, մեկ տարի էլ չեն դիմանալու, որովհետև դժգոհություններ շատ կլինեն»:

Խնդրեցինք նաև անդրադառնալ Խորեն Հովհաննիսյանի՝ իր թեկնածությունը հանելու որոշմանը:

 «Անընդհատ մեկին քննադատելուց հետո նրան պաշտպանելը ինձ համար տարօրինակ է: Ես ուղղակի անակնկալի եկա, երբ լսեցի, թե Խորիկը պաշտպանելու է  Մելիքբեկյանի թեկնածությունը: Չեմ ուզում անձամբ իր մասին որևէ բան ասել, նա մեր լավագույն ֆուտբոլիստն է,  պարզապես նա կազմակերպչական փորձ չունի, իսկ ֆեդերացիան շատ խոշոր կառույց է, և ինքը չի կարողանա ղեկավարել: Այս ամենն իմ գլխում չի տեղավորվում»,- եզրափակեց նա:

Նշենք նաև, որ ՀՖՖ-ի հետ կապ հաստատել չստացվեց: