Չինաստանում $182 մլն-ի կեղծ դեղորայք է հայտնաբերվել

Չինաստանում ձերբակալվել է 2,000 մարդ, որոնք կասկածվում են ավելի քան $182 մլն-ի կեղծ դեղորայքի արտադրության և իրացման մեջ: Բացի այդ, ամբողջ երկրում հայտնաբերվել և առգրավվել են ավելի քան 1,100 դեղեր պատրաստելու հաստոցներ: Այդ մասին հայտնել է Չինաստանի անվտանգության նախարարությունը, սակայն չի նշվել՝ երկրի ներքին շուկայում են իրացվել այդ դեղորյայքները, թե արտաքին:

Այդ օպերացիայի իրականացման համար ներգրավվել է 18,000 ոստիկան: Հիմնականում հաջողվել է հայտնաբերել դիաբետի, արյան բարձր ճնշման, ուռուծքի և հիստերիայի բուժման համար նախատեսված կեղծ դեղամիջոցներ: Ոստիկանության աշխատողները նշել են, որ կեղծ դեղամիջոցներ արտադրողներն իրենց արտադրանքը գովազդելու համար դիմել են ծայրահեղ միջոցների՝ հայտարարություններ են տվել թերթերում, հեռուստաալիքներում և համացանցում: Կեղծ դեղորայքները մարդկանց մոտ առաջացրել են լյարդի և սրտի խնդիրներ:

Ոստիկանությունը հայտարարել է, որ կեղծ դեղորայքներ արտադրողնեի մասին յուրաքանչյուր ինֆորմացիա տվողը կպարգևատրվի $8,000-ով: Հիշեցնենք, որ Չինաստանի դեղագործական շուկան համարվում է աշխարհի ամենաարագ զարգացողը:

Համաձայն Առողջության համաշխարհային կազմակերպության, զարգացող երկրների դեղագործական շուկայի 30%-ը կեղծ և վտանգավոր դեղամիջոցներ են: Զարգացած երկրներում այդ ցուցանիշը բավականին ցածր է՝ մոտ 1%:

Չինաստանը և Հնդկաստանը աշխարհի ամենամեծ կեղծ դեղորայքների մատակարարներն են: Ամեն տարի կեղծ դեղամիջոցների պատճառով ամբողջ աշխարհում մահանում է 700,000 մարդ, այն էլ միայն տուբերկուլյոզ և մալարիա հիվանդությունով տառապողների շրջանում: