Համայնքների խոշորացումները կլինեն ըստ իրավիճակի. գործընթացը կավարտվի 2021- ին

Կառավարությունը 2020-ին համայնքների խոշորացումներ կանի ըստ իրավիճակի, խոշորացման գործընթացը կավարտվի 2021-ին:

Այս մասին իր տարեվերջյան ամփոփիչ ասուլիսում հայտնեց ՀՀ տարածքային կառավարման և ենթակառուցվածքների նախարար Սուրեն Պապիկյանը:

«Խոշորացված համայնքները տնտեսապես ավելի կայուն են, և սուբվենցիոն ծրագրերից հիմնականում կարողանում են ավելի լավ օգտվել խոշոր և խոշորացված համայնքները: Ընդհանրապես խոշորացված համայնքներն աչքի են ընկնում կազմակերպական դրական միտումով, և սա բերում է նրան, որ մենք կարծում ենք, որ համայնքների հետագա խոշորացումը մեր կառավարության առաջիկա անելիքների մեջ է:  2020 թվականի խոշորացումները լինելու են ըստ իրավիճակի, այսինքն` եթե կունենանք համայնքներ, որտեղ կստեղծվեն իրավիճակներ, ինչպես օրինակ ստեղծվել է Իջևան համայնքում, մենք կխոշորացնենք այդ համայնքները»,-ասաց Պապիկյանն ու հավելեց՝ 2021 թվականը իրենց տեսլականով այն տարեթիվն է, երբ  ընդհանրապես պիտի ավարտվի խոշորացման գործընթացը:

Նա նշեց՝ այդ ուղղությամբ նաև մի շարք օրենսդրական փոփոխություններ են կատարում: Պապիկյանը հիշեցրեց, որ վերջերս ԱԺ-ն ընդունել է օրենք, որը համայնքներին խոշորացման գործընթացի համար խորհրդատվական ձայնի հնարավորություն է տալիս:  Նախարարը տեղեկացրեց նաև, որ առաջիկայում հանրային քննարկման կդրվի հանրապետության բոլոր խոշոր և խոշորացված համայնքներում համամասնական ընտրակարգի ներդրման հարցը: «2020-ին խոշորացվող համայնքներ կան, բայց ավարտը և հիմնական ծավալը 2021-ն է, որով ավարտելու ենք խոշորացման գործընթացն ընդհանրապես»,-ասաց Պապիկյանը: