Հնարավոր չէ նման բան․ Մելիքբեկյանը՝ Հենրիխ Մխիթարյանին հավաքական չհրավիրելու մասին (տեսանյութ)

Հայաստանի ֆուտբոլի ֆեդերացիայի գործկոմի նախկին անդամ, ֆուտբոլի ընտրանու ավագ Հենրիխ Մխիթարյանի մայրը` Մարինե Թաշչյանը, ՀՖՖ նախագահի ընտրությունը համարում է խայտառակություն: «Այս ընտրությունները խայտառակ շոու էր, ոչ թե ընտրություններ: Ամեն ինչ նախապես պայմանավորված էր: Ես արդեն 40 տարի է, ինչ ֆուտբոլում եմ և այսպիսի խայտառակություն դեռ չէի տեսել»,- լրագրողների հետ զրույցում ասաց Թաշչյանը:

Վերջինս ասաց, որ ՀՖՖ նորընտիր նախագահը նախապես հանդիպել և պայմանավորվել էր բոլոր ակումբների հետ: «Իմ թեկնածությունը գործկոմի ընտրություններում առաջադրել էր «Նորացված Փյունիկ» ՀԿ-ն, և նրանք ամեն ինչ անեցին, որ այն կասեցնի գործունեությունը: Երևի ես նրանց խանգարում եմ ֆուտբոլի մեջ: Ես ֆեդերացիայում չեմ աշխատում արդեն մեկ տարի է»,-ասաց նա:

Թաշչյանի կարծիքով, որ այս դեպքում հայկական ֆուտբոլը չի զարգանա: Նա հիշեցրեց, որ դեռևս նախորդ գործկոմի հրաժարականից հետո ինքը հրաժարական չի տվել, և ըստ օրենքի նա պետք է մնար իր տեղում` Գործադիր կոմիտեի կազմում:

Հայաստանի ֆուտբոլի ֆեդերացիայի նորընտիր նախագահ Արմեն Մելիքբեկյանն իր հերթին նշեց, որ պատրաստվում է համագործակցել բոլոր ակումբներին հետ և խոստանում է, որ ֆեդերացիայի և այլոց միջև անջրպետներ չեն լինելու: «Այս ընտրությունները վերջին տարիների մեջ առաջին անգամ անցկացված մրցակցային ընտրություններն են: Ինչը դրական գործընթաց է հայկական ֆուտբոլում: Սիրում եմ և հարգում եմ ՀՖՖ և նախկին, և ներկա գործկոմի անդամներին և պատրաստ եմ նրանց հետ աշխատել: Հայկական ֆուտբոլում որևէ անջրպետ չի լինելու»,- լրագրողների հետ ճեպազրույցում ասաց նա:

Մելիքբեկյանը շեշտեց, որ ինքը երբեք ակումբային շահեր չի ունեցել և չի ունենալու, նա պատրաստ է համագործակցել բոլոր ակումբների հետ: ՀՖՖ նորընտիր նախագահն ընդգծեց, որ իր առանձնակի ուշադրությանը կարժանանա պրոֆեսիոնալ լիգայի ստեղծումը: ՀՖՖ նախագահը բացառեց այն խոսակցությունները, որ Մխիթարյանի մոր հետ ունեցած տարաձայնություններ պատճառով Հենրիխ Մխիթարյանը կարող է չհրավիրվել հավաքականը:

«Հայաստանի հավաքականի կազմը որոշում է մարզիչը, և ես չեմ կարող պատկերացնել այնպիսի մի մարզչի ով չի հրավիրի հավաքական Հենրիխ Մխիթարյանին»,-շեշտեց նա: