«Առավոտ». ՀՀԿ–ն Մնացական Մնացականյանի նկատմամբ տույժ չի՞ կիրառի

«Առավոտ»-ի հարցին` Մնացական Մնացականյանի հանդեպ կուսակցական տույժ կկիրառվի՞, որ չենթարկվեց ՀՀԿ-ի որոշմանը և Թալինի քաղաքապետի ընտրություններում ինքնուրույն գիծ տարավ, ՀՀԿ խմբակցության ղեկավար Գալուստ Սահակյանն ասել է. «Որևէ մեկի նկատմամբ տույժ չի կիրառվի: Ի՞նչ է պատահել, որ տույժ կիրառվի»:

Դիտարկմանը, որ ՀՀԿ-ն առաջադրեց և սատարեց Սարգիս Արամյանին, մինչդեռ Մնացականյանը Վորոշ Խաչատրյանին էր սատարում, Գալուստ Սահակյանը պատասխանել է. «Կուսակցությունն ում որ սատարել է, նա էլ անցել է, որպես քաղաքապետ: Մնացածը՝ հորինվածքներ են»:

Գալուստ Սահակյանի կարծիքով, Թալինում կայացած ՏԻՄ ընտրությունների նկատմամբ հետաքրքրությունը մեկ բանով էր պայմանավորված. «Սեպտեմբերին համապետական ընտրություններ են»: Ներքին ինտրիգները, նրա կարծիքով, այս դեպքում չափազանցված էին:

Թերթի նույն հարցին՝ նախագահի հանձնարարականների առկայության պարագայում ինչո՞ւ որոշ կուսակցականներ, ի դեմս ՀՀԿ-ական պատգամավոր Մնացական Մնացականյանի, որոշեցին ինքնուրույն գործել, Արագածոտնի ՀՀԿ-ական մարզպետ Սարգիս Սահակյանը պատասխանել է. «ՀՀԿ-ն միասնական, կուռ կառույց է Թալին քաղաքում։ Շատ համախմբված կառույց է, և մեկ անդաստիարակի մտածելակերպը չի նշանակում, որ պետք է ստվերվի ՀՀԿ-ի գործունեությունը կամ ՀՀԿ-ի կառուցողական մոտեցումները։ Նման մարդկանց մենք պատժում ենք ու կպատժենք»։ Թերթը մարզպետից հետաքրքրվել է՝ ի՞նչ նկատի ունի «պատժել» ասելով՝ ծեծելո՞ւ են, թե՞ անկյուն են կանգնեցնելու։ «Կպատժենք լեռնցու օրենքներով»,– եղավ պատասխանը։ Այս առիթով «Առավոտը» փորձել է ստանալ Մնացական Մնացականյանի մեկնաբանությունները։ Վերջինս այդպես էլ չի պատասխանել հեռախոսազանգերին։