Հող ազատագրելուց մինչև հրաժարական. ՔՊ-ական նախկին ու ներկա մարզպետների «ձեռքբերումները»

Վերլուծական 24 Դեկտեմբեր, 2019 16:30

Շարունակելով Նոր Հայաստանի սկանդալային պաշտոնյաներին նվիրված շարքը, այսօր անդրադառնանք Վայոց ձորի, արդեն, նախկին և Գեղարքունիքի ներկայիս մարզպետներին: Իհարկե, թերևս ամենասկանդալային մարզպետի տիտղոսը պատկանում է հենց Տրդատ Սարգսյանին, ով և հեռացավ անչափ ռեզոնանսային պատմության ֆոնին: Բանն այն է, որ, ըստ մամուլի տեղեկությունների, այս տարվա սեպտեմբերի 18-ին Եղեգնաձոր քաղաքում Վայոց ձորի մարզպետ Տրդատ Սարգսյանի, նրա օգնական Հարություն Գրիգորյանի ու նրանց ընկերների մասնակցությամբ ծեծկռտուքի դեպք է գրանցվել։

Մարզպետը իր ընկերների հետ ծեծի է ենթարկել փոխգնդապետ Արա Մխիթարյանին, որը գործող զինվորական է և ծառայում է N զորամասում: Թեև Սարգսյանին մեղադրանք չառաջադրեցին, սակայն նա հրաժարական տվեց զբաղեցրած պաշտոնից ՝ փորձելով մեղմել հանրային արձագանքը և այն քննադատությունը, որին ենթարկվում էր իշխող քաղաքական ուժը: Մինչ հրաժարականն էլ, Սարգսյանից դժգոհում էին մարզի բնակիչները, մամուլում գրում էին, որ Տրդատ Սարգսյանը սերտ կապերի մեջ է Հանրապետական կուսակցության անդամների հետ, մարզում կատարվող ապօրինությունները կանխելու քայլեր չի իրականացնում եւ անգործության է մատնված: Մամուլում նաև բազմաթիվ էին հրապարակումներ, համաձայն որոնց՝ նախկին մարզպետը ճնշում էր բանեցնում նաև Ջերմուկի ավագանու վրա՝ Ամուլսարի հարցում կառավարության համար ցանկալի որոշում կորզելու նպատակով:

Ինչ վերաբերվում է Գեղարքունիքի ՔՊ-ական մարզպետ Գնել Սանոսյանին, ապա վերջինս նույնպես հայտնվել է մի շարք տհաճ պատմությունների կիզակետում, օրինակ, երբ մարզպետի հրաժակարականի պահանջով ճանապարհ էին փակում հենց իր կուսակից ընկերները: Հիշեցնենք որ Մարտունի քաղաքի մի խումբ բնակիչներ նոյեմբերի 15-ին բողոքի ակցիա են իրականացրել և փորձել են փողոց փակել։ Ակցիայի մասնակիցները պահանջում էին Սանոսյանի հրաժարականը։ Լրագրողների հետ զրույցում Մարտունի քաղաքի բնակիչ Վիգեն Խաչատրյանն էլ նշել էր, որ ակցիան նախաձեռնել են հիմնականում «Քաղաքացիական պայմանագիր» կուսակցության անդամները։ Կհիշվի նաև Սանոսյանի հեռակա բանավեճը Հրանտ Բագրատյանի հետ, երբ մարզպետը բավական սուր և կտրուկ գրառում էր կատարել, հայտարարելով՝ ամաչում է, որ իր հայրենիքը մի քանի տարի նման վարչապետ է ունեցել: Համացանցում բավական սարկաստիկ մեկնաբանություններ էին պտտվում նաև՝ կապված Սանոսյանի այն հայտարարության հետ, որ իր աշխաավարձի բարձրացումը արդարացված է, քանի որ ինքը «1500 հեկտար հող է ազատագրել նախկին գյուղապետներից»: