Լույս է տեսել «Գիտական Արցախ» պարբերականի 2019-ի 2-րդ համարը․ քննարկում ԵՊՀ-ում (տեսանյութեր)

Այսօր` դեկտեմբերի 23-ին, Երևանի պետական համալսարանում տեղի ունեցավ «Գիտական Արցախ» պարբերականի 2019 թվականի 2-րդ համարի շնորհանդեսը։ Խմբագրական խորհրդի անդամների ու հոդվածագիրների միջև տեղի ունեցած հանդիպում-քննարկման ժամանակ վերջիններս կիսվեցին իրենց տպավորություններով և առաջարկներով։ 

ԼՈՒՐԵՐ․com—ի հետ զրույցում «Արցախի երիտասարդ գիտնականների և մասնագետների միավորում» ՀԿ-ի հիմնադիր Ավետիք Հարությունյանը նշեց, որ «Գիտական Արցախ»-ի այս համարը նվիրված է ԵՊՀ հիմնադրման 100-ամյակին․ «Այս համարում տեղ են գտել աշխարհի 8 երկրներ ներկայացնող մոտ 50 հեղինակի հոդվածներ։ Նպատակն այն է, որ նաև գիտության միջոցով Արցախը ճանաչելի դարձվի, ինչպես նաև երիտասարդներին հնարավորություն տալ իրենց աշխատանքները տպագրել և հետագայում իրենց թեկնածուական, դոկտորական ատենախոսությունները պաշտպանել»- ասաց Հարությունյանը։

«Գիտական Արցախ»-ի հոդվածագիրներից Արտաշես Խալաթյանն էլ նշեց, որ պարբերականում տեղ են գտել տարբեր թեմատիկայով հոդվածներ՝ իրավագիտություն, քաղաքագիտություն, միջազգային հարաբերություններ, պատմություն, հոգեբանություն, լեզվաբանություն․ «Հիմնական նախապատվությունը տրվում  է այն հոդվածներին, որոնք այդ թեմատիկայի շրջանակում որոշակի աղերսներ ունեն Արցախի հետ։ Պարբերականի այս համարում ես անդրադարձել եմ «Թավշյա հեղափոխությունից» հետո Արցախյան հիմնահարցի հայեցակարգի ձևավորմանը, այսինքն՝ ինչ հայեցակարգային փոփոխություններ են տեղի ունեցել Թավշյա հեղափոխությունից հետո Հայաստանի և Արցախի միասնական դիրքորոշման մեջ Արցախի հարցի կարգավորման ուղղությամբ»,- ասաց Խալաթյանը։ 

Նշենք, որ «Գիտական Արցախ»-ը ստեղծվել է Արցախի երիտասարդ գիտնականների և մասնագետների միավորման նախաձեռնությամբ՝ նպատակ ունենալով հնարավորություն տալ երիտասարդ հետազոտողներին ներկայացնել իրենց աշխատանքները։

Ի դեպ, պարբերականի 1-ին համարը լույս էր տեսել ամռանը։ 

Սոնա Հարությունյան