Նոր իշխանությունների սկանդալային դեմքերը. փոխնախարարներ

Վերլուծական 27 Դեկտեմբեր, 2019 16:30

Նոր Հայաստանում անգամ շատ դեպքերում հանրության աչքից հեռու, ստվերում և բյուրոկրատական աշխատանքին լծված պաշտոնյաներն են հաջողացրել հայտնվել տարատեսակ սկանդալային պատմությունների մեջ: Խոսքը առաջին հերթին փոխնախարարների մասին է, քանի որ ունենք նորանկախ Հայաստանի համար բավական արտառոց մի վիճակ, երբ մեկ տարվա ընթացքում միանգամից երկու պաշտոնյանի հանդեպ քրեական գործ հարուցվեց և վերջիններս կալանավորվեցին: Առաջին նման դեպքը գրանցվեց առողջապահության փոխնախարարի հետ և դա մի պարագայում, երբ նախարար Արսեն Թորոսյանը հեղափոխությունից հետո առիթը բաց չէր թողնում պարծենալու, թե ինչպես է ոլորտը մաքրել կոռուպցիայից: Արդյունքը, ինչ խոսք, տպավորիչ էր: Վերաբաշխման արդյունքում պետպատվերի շրջանակներում տարբեր ծրագրերով հատկացվելիք գումարներով կազմակերպության ֆինանսավորման պակասը լրացնելու համար 2019 թվականի մարտի 30-ին առողջապահության նախարարի տեղակալին վերջինիս աշխատասենյակում, որպես կաշառք, տրվել է առանձնապես խոշոր չափերով գումար, որի փոխանցումն իրականացվել է ՀՀ ԱԱԾ աշխատակիցների օպերատիվ վերահսկողության ներքո: Փոխնախար Արսեն Դավթյանը արդյունքում կալանավորվել է:

Հաջորդ դեպքը արձանագրվեց արդեն ԿԳՄՍ փոխնախարար Գևորգ Լոռեցյանի հետ: 2019թ. դեկտեմբերի 4-ին, առանձնապես խոշոր չափերով կաշառք ստանալու կասկածանքով, բերման է ենթարկվել ՀՀ կրթության, գիտության, մշակույթի և սպորտի նախարարի տեղակալը, ինչպես նաև վերջինիս վարորդն ու ՀՀ-ում գործող ֆուտբոլային ակումբներից մեկի նախագահը, որը միաժամանակ հանդիսանում է նաև մի շարք մատակարարող ընկերությունների փաստացի ղեկավարը: Ձեռք բերված նախնական տվյալների համաձայն՝ ՀՀ ԿԳՄՍ նախարարի տեղակալը, նախարարության ենթակա հիմնարկների կարիքների համար մարզագույքի և մարզահագուստի ձեռքբերման նպատակով հայտարարված մրցույթներում աջակցություն ցուցաբերելով վերոնշյալ տնտեսվարողին, դրա դիմաց վարորդի օժանդակությամբ պայմանավորվածություն է ձեռք բերել ստանալ առանձնապես խոշոր չափերով կաշառք գումար:

Մյուս փոխնախարարները, թեև չեն հայտնվել բացահայտ կոռուպցիոն սկանդալների կիզակետում, սակայն պետք է փաստել, որ վերջիններիս նշանակումը արդեն իսկ բուռն քննարկման առարկա դարձավ մամուլում և սոցիալական ցանցերում, կապված վերջիններիս՝ սորոսականների հետ ունեցած սերտ կապերի հետ: Մասնավորապես, նշվում էր ՀՀ աշխատանքի և սոցիալական հարցերի նախարարի առաջին տեղակալ Գեմաֆին Գասպարյանի անունը, ով 2013-2019 թթ. հիմնադրել է և ղեկավարել «Բուն» գիտամշակութային հիմնադրամը, որի ներքո մինչ օրս էլ գործում են «Բուն TV» գիտամասնագիտական առցանց ալիքը: 2014 թվականին Սորոսի հիմնադրամից ստացված գրանտի թեման ԼԳԲՏ-ներն էին, 2017թ-ին ստացված գրանտը՝ Ապրիլյան պատերազմը: Մյուս սորոսական փոխնախարարն է՝ Արևիկ Անափիոսյանը՝ Կրթության նախարարությունից, մամուլը սորոսականների շարքին էր դասել նաև Սպորտի և Երիտասարդության հարցերով փոխնախարար՝ Կրիստինա Ասատրյանին, որը ևս սերտ հարաբերությունների մեջ է լգբտ-ների և թուրքական կազմակերպությունների հետ։ Այդ մասին, ըստ մամուլի հպարակումների, նաև իր ՍՎ-ում է գրված։