Սրտաճմլիկ նամակներ անհայտ «մտավորականությունից»

Այսօր «Առավոտ» օրաթերթում տեղեկություն էր հրապարակվել այն մասին, որ մի շարք մտավորականներ դիմում են Ռուբեն Հայրապետյանին խնդրանքով, որ նա վայր չդնի իր պատգամավորական մանդատը։ Այս ամենի վերաբերյալ Lurer.com-ը զրուցեց «Պահանջում ենք պատժել Հարսնաքարի միջադեպի բոլոր մեղավորներին» քաղաքացիական նախաձեռնության անդամ, քաղաքացիական ակտիվիստ, հրապարակախոս Զարուհի Հովհաննիսյանի հետ.

«Պալատական և գրպանային՝ այսպես կոչված «մտավորականությունը» դարձյալ հիշեցրեց իր գոյության մասին՝ թախանձագին խնդրելով Ռուբեն Հայրապետյանին վայր չդնել պատգամավորական մանդատը:

Այս քայլը մենք կանխատեսել էինք, և նման խայտառակ շրջադարձից, ավելի ճիշտ՝ հետդարձից խուսափելու համար էլ նախաձեռնել էինք արտահերթ նստաշրջան հրավիրելու ստորագրահավաքը, որպեսզի մանդատը վայր դնելու գործընթացը հասներ իր իրավական ավարտին: Սակայն, ինչպես տեսնում եք, կանխատեսումներն իրականանում են ու արդեն հայտնվում են խնդրողներ ու թախանձողներ, որպեսզի այդ բռնության քարոզիչն ու Հարսնաքարում տեղի ունեցածի հիմնական մեղավորը մնա խորհրդարանում:

Դրան զուգահեռ, փութաջանորեն կոծկվում է քրեական գործը, վերաորակվելով անփույթ սպանություն, այլ ոչ դիտավորյալ սպանություն, այնինչ մարդն ակնհայտորեն մահացել է ոհմակային դաժան և դիտավորյալ ծեծի արդյունքում, որը ոչ այլ ինչ է, քան դիտավորյալ սպանություն: Այսպիսով, ինչպես և կանխատեսում էինք, սեպտեմբերյան նստաշրջանին ընդաառաջ փորձում են փոխել հանրային տրամադրություններն ու սրտաճմլիկ նամակների սուտ ազդեցության տակ շարունակել բռնության քարոզն ու ապրելակերպը»։

Զարուհի Հովհաննիսյանը նաև նշեց, որ հանրային բողոքի ալիքը չի դադարելու, և հետամուտ են լինելու, որպեսզի պատժվեն բոլոր մեղավորները, այդ թվում՝ բռնության հրապարակային քարոզչությամբ հաճախակի զբաղվող ու աչքի ընկնեղ Նեմեց Ռուբոն:

Հիշեցնենք, որ վերոհիշյալ հայտարարության տակ ստորագրել էին հանրությանը անհայտ մի շարք մտավորականներ.

Համլետ Մատինյան - քանդակագործ, ՀՀ վաստակավոր նկարիչ
Հենրիկ Կարապետյան - տեխ. գիտ. թեկնածու, դոցենտ
Հարություն Սիմոնյան - տեխ. գիտ. թեկնածու, դոցենտ
Խաչատուր Ղազարյան - ԵՊՀ, ֆիզմաթ գիտ. թեկնածու
Տաճատ Սաֆարյան - աշխատանքի վետերան, անհատական թոշակառու
Օլեգ Քամալյան - ԵՊՀ ֆիզիկական քիմիայի ամբիոնի պրոֆեսոր, ՀՊԱՀ ընդհանուր քիմիայի ամբիոնի վարիչ, քիմիական գիտությունների դոկտոր
Վլադիմիր Գյուլումյան - Ավանի Հայրենական պատերազմի, զինված ուժերի, թիկունքի և աշխատանքի վետերանների խորհրդի նախագահ
Թորգոմ Նալչաջյան - տեխ. գիտ. դոկտոր, պրոֆեսոր
Լեոնարդ Շեկյան - ֆիզմաթ գիտ. թեկնածու, դոցենտ