Նոր իշխանությունների սկանդալային դեմքերը. փոխմարզպետներ

Վերլուծական 28 Դեկտեմբեր, 2019 17:00

Նոր Հայաստանում սկանդալային պատմությունների մեջ հայտնվելուց զերծ չեն մնացել նաև հարաբերականորեն ստվերում գործող պաշտոնյաները, ովքեր, ըստ էության, պետք է զբաղվեին բյուրոկրատական աշխատանքներով և հնարավորինս քիչ տեղ գտնեին հայրենի մեդիայի սկանդալային քրոնիկոնում: Սակայն, պետք է փաստել, որ ՀՀ փոխմարզպետների մոտ դա այնքան էլ չի ստացվել: Առաջին լուրջ միջադեպը փոխմարզպետի մասնակցությամբ գրանցվեց ապրիլի 27-ին՝ «Քաղաքացու օրը», որը լարված էր անցել Վայոց ձորի մարզկենտրոն Եղեգնաձորում: Միջադեպ էր տեղի ունեցել ՀՀ ԱԺ «Բարգավաճ Հայաստան» խմբակցության պատգամավոր Սերգեյ Բագրատյանի և Վայոց ձորի փոխմարզպետ Ռազմիկ Տոնոյանի միջև: Վերջինս հաղորդում էր ներկայացրել ոստիկանություն, որ պատգամավոր Սերգեյ Բագրատյանն ու Եղեգիս համայնքի Արտաբույնք բնակավայրի վարչական ղեկավար Արմեն Սեդրակյանը հարձակվել են իր վրա, անհարգալից վերաբերմունք ցուցաբերել, իր հասցեին հնչեցրել հայհոյանքներ: Սերգեյ Բագրատյանը, սակայն, հերքել է իր մասնակցությունը միջադեպին: Ռազմիկ Տոնոյանը արդյունքում հեռացվեց զբաղեցրած պաշտոնից, սակայն բերվեց այլ հիմնավորում, պարզվում է ՝ փոխմարզպետը հաճախ էր բացակայում: Սակայն, այսքանով Տոնոյանը չհանգստացավ և պարբերաբար տարատեսակ հայտարարություններ է հնչեցնում նախկին գործընկերների հաշվին, մասնավորապես, վերջերս էլ ֆեյսբուքյան ուղիղ եթերներից մեկի ընթացքում հայտարարել էր, որ Վայոց ձորի մարզում իշխում են ծովահենները, ի դեմս մարզպետի, ԱԱԾ պետի և համայնքի ղեկավարների:

Մամուլում արծարծվել է նաև Արմավիրի փոխմարզպետի անունը, ըստ հրապարակումների, գյուղնշանակության հողի վրա նման շուկա կառուցելու թույլտվության հետևում կանգնած են Արմավիրի մարզպետ Համբարձում Մաթևոսյանը և փոխմարզպետ Կարեն Գրիգորյանը: Վերջիններս սակայն հերքել են իրենց կապը շուկայի կառուցման հետ: Լրագրողները նաև փորձել են պարզել փոխմարզպետի՝ զինվորական ծառայությունից ազատվելու հիմքերը: Սակայն, Կարեն Գրիգորյանը հրաժարվել է լրատվամիջոցներին զինգրքույկի պատճենի այն էջը տրամադրել, որից երևում է, թե որ հոդվածով են ազատվել զինծառայությունից՝ վկայակոչելով «Անձնական տվյալների պաշտպանության մասին» օրենքը:

Մամուլը անդրադարձել էր նաև նաև Արագածոտնի մարզպետարանում եռացող կրքերին, պնդելով, որ Արագածոտնի մարզպետ Դավիթ Գևորգյանի և փոխմարզպետ Անահիտ Սարգսյանի «ջրերը մի առվով չեն հոսում», նրանց միջև հակասություններ կան, որոնք չեն կարողանում հարթել։ Ըստ մամուլի՝ Անահիտ Սարգսյանը ժամանակին համակարգել է մարզի կրթական ոլորտը, և, ըստ տեղեկությունների, կառավարությանը հասցեագրված մի նամակին օրինական ընթացք տալու պատճառով հակասություն է առաջացել մարզպետի և փոխմարզպետի միջև: Դրանից հետո Սարգսյանը Փաշինյանի որոշմամբ ազատվեց զբաղեցրած պաշտոնից` պնդելով սակայն, որ այդ մասին իմանում է մամուլից: