Մարտահրավեր` Նիկոլ Փաշինյանին. վարչապետը՝ ՌԴ և արևմուտքի արանքում

Վերլուծական 28 Դեկտեմբեր, 2019 20:00

«Սասնա ծռերը» հայտարարում են՝ ավարտվում է գործող իշխանություններին աջակցողի իրենց դերակատարությունը, և գալիք 2020-ից հանդես են գալու իբրև արմատական ընդդիմություն՝ օրակարգում ունենալով արտահերթ ընտրությունների անցկացումն ու իրական «սպիտակների» բևեռ ստեղծելու ծրագիրը։ «Ծռերի» համոզմամբ՝ գործող իշխանությունը չունի համակարգային փոփոխություններ կատարելու բավարար կամք և կարողություն, հետևաբար, ինչպես նշված է կուսակցության` այսօր տարածած հայտարարության մեջ, ժամանակն է, որ «իրեն սպիտակ երևակայող ներկայիս իշխանությունը ունենա իրական այլընտրանք»։

Վերջին ամիսների ընթացքում մի շարք փաստացի ապացույցներ ներկայացվեցին, որոնք վկայում էին Սասնա Ծռերի և Հայաստանում Սորոսի գրասենյակի միջև եղած կուռ համագործակցության մասին: Սակայն, անգամ առանց այդ փաստերի հանրայնացման էլ, գաղտնիք չէ, որ ստեղծման առաջին իսկ օրվանից այս ուժը ունեցել է վառ ընդգծված արևմտամետ ուղղվածություն: Ուշագրավ է, որ հեղափոխությունից հետո Ծռերի դեմ հարուցված քրեական գործերը կարճվեցին, իսկ ինքը` Փաշինյանը, ԱՄՆ այցին ընդառաջ ընդունեց կուսակցության ղեկավարությանը, ի դեպ, այդ քայլը միանշանակ չնկալվեց հանրության կողմից:

Փաշինյանը ԱՄՆ էր մեկնում հայ-ամերիկյան հարաբերություններում աննախադեպ ճեղքում արձանագրելու նպատակով, սակայն, ինչպես վկայում են այդ հանդիպման արդյունքները, ճեղքումը այդպես էլ իրականություն չդարձավ: Ավելին, ԱՄՆ-ից վերադառնալուց հետո Փաշինյանը ՌԴ արտգործնախարարի հետ հայտնի մեմորանդումը ստորագրեց, որով թույլ է տրվում ռուս մասնագետների մուտքը Հայաստանում գործող ամերիկյան բիոլաբորտարիաներ: Դրանից քիչ ժամանակ անց պարզ դարձավ, որ Արցախի հարցում էլ Փաշինյանը առավելապես հակված է ՌԴ դիրքորոշմանը և դեմ չէ բանակցային սեղան Լավրովի պլանը վերադարձնելուն, ինչը նաև ենթադրելու է ՀԱՊԿ խաղաղապահների տեղակայում Արցախում, մի բան, ինչը արևմուտքը ակնհայտորեն չէր կարող մարսել: Հենց Փաշինյանի այս պրո-ռուսական ռևերանսներից հետո էլ մինչ այս քիչ թե շատ լոյալություն պահող սորոսականները թիրախավորեցին վարչապետին և նրա քաղաքական թիմին: Գրեթե յուրաքանչյուր օր տեղի են ունենում հանրային քննարկումներ, սորոսականները հանդես են գալիս ծավալուն գրառումներով, որտեղ թիրախավորում են հատկապես ուժային համակարգը: Պատճառն էլ պարզ է՝ Փաշինյանը, ըստ էության, հրաժարվել է այս ոլորտը սորոսականներին հանձնել:

Դրանով է պայմանավորված վերջիններիս դժգոհությունը, իսկ ինչ վերաբերվում է Սասնա Ծռերին, ապա այս քաղաքական ուժի կողմից երեկ հնչեցրած հայտարարությունը պրո-արևմտյան ուժերի դեղին քարտն է Նիկոլ Փաշինյանին: Վարչապետին հասկացնում են, որ եթե վերջինս հրաժարվի կատարել ձեռք բերված պայմանավորվածությունները և բավարարել սորոսականների քաղաքական քմահաճույքները, ապա 2020-ին նա կարող է է´լ ավելի լուրջ գրոհի տակ հայտնվել, գրոհ, որի վերջնական արդյունքը կարող է լինել սորոսականներին Փաշինյանից անջատելը: Սա կլինի այն դեպքում, եթե արևմուտքը վերջնականապես հույսը կտրի հեղափոխական թիմից: Փաշինյանն էլ իր հերթին գիտակցում է, որ միայն պրո-ռուսական կամ պրո-արևմտյան գծի պաշտպանությունը հղի է լուրջ քաղաքական ռիսկերով և դրանց բացառելու համար փորձում է կողմերին տարատեսակ ռևերանսներ անել: Սասնա Ծռերի երեկվա հայտարարությունը մեսիջ էր Փաշինյանին, որ արևմուտքը երկար չի հանդուրժելու միանգամից երկու աթոռին նստելու վերջինիս ցանկությունը…