Գեղարքունիքում կանայք այլևս չեն վախենում հասարակական կարծիքից

2011-ին Կանանց իրավունքների կենտրոնը ստացել է 2032 բռնության ահազանգ, 2010-ին՝ 1777, իսկ այս տարի՝ արդեն 1383 ահազանգ: Այդ մասին այսօր հրավիրած ասուլիսում նշեց Կանանց իրավունքների կենտրոնի հասարակայնության հետ կապերի պատասխանատու Թագուհի Արշակյանը:

Ըստ կենտրոնի աշխատակիցների՝ նկատվում է բռնության ահազանգերի, ինչպես նաև կենտրոն այցելությունների աճ: Սակայն ըստ նրանց՝ սա պայմանավորված է ոչ թե բռնության դեպքերի աճով, այլ իրազեկվածության բարձրացմամբ:

«Նախկինում կանայք վախենում էին հարևանի, հասարակության կարծիքից, մտածում էին՝ ինչ կասեն մարդիկ, եթե իմանան, որ ամուսինն իրեն բռնության է ենթարկում: Հիմա այդ մոտեցումը քիչ թե շատ փոխվում է: Այդ պատճառով ավելանում են և՛ զանգերը, և՛ այցերը»,- նշեց կենտրոնի հոգեբան Մարինե Մարտիրոսյանը:

«Փաստինֆո»-ի փոխանցմամբ, կանանց իրավունքների կենտրոնը հիմնականում զբաղվում է ընտանեկան բռնություններով և տրամադրում է իրավաբանական և հոգեբանական անվճար խորհրդատվություն ընտանիքում բռնության ենթարկված կանանց: Թեժ գծի հեռախոսահամարն է 010 54 28 28:

Քանի որ հայ բնակչությունը կենտրոնացված է մայրաքաղաքում, բռնության ահազանգերը Երևանի ճգնաժամային կենտրոն ավելի շատ են լինում: Թագուհի Արշակյանի խոսքով՝ կենտրոնը Հայաստանի չորս մարզերում ևս ունի ճգնաժամային կենտրոններ, որտեղ ևս գործում է շուրջօրյա թեժ գիծ: Կանայք կարող են զանգահարել ու ստանալ իրավաբանական և հոգեբանական խորհրդատվություն: Սակայն մարզային վիճակագրությունը բավականին տարբերվում է Երևանի վիճակագրությունից:

«2011-ին Երևանի ճգնաժամային կենտրոնը ստացել է բռնության 2032 ահազանգ, մինչդեռ չորս մարզերում միասին նույն թվականին եղել է ընդամենը 806 ահազանգ: Ավելի շատ բռնության դեպք արձանագրվում է Գեղարքունիքի մարզում»,- «Փաստինֆո» գործակալության թղթակցի հետ զրույցում նշեց Թագուհի Արշակյանը: Ըստ նրա՝ վիճակագրական տվյալների տարբերությունը պայմանավորված է ոչ թե նրանով, որ Երևանում բռնության դեպքերն ավելի շատ են, այլ տարբեր մոտեցումներով:

«Գյուղերում միմյանց ճանաչելով՝ վախենում են հարևանի կարծիքից, հասարակության արձագանքից»,- նշեց կենտրոնի հոգեբան Մ. Մարտիրոսյանը:
Կենտրոնի տվյալներով՝ բռնության ահազանգերի մեջ գերակշռում են հոգեբանական բռնության դեպքերը: Օրինակ՝ 2011-ին ստացած 2032 ահազանգից 1042-ը եղել են հոգեբանական:

«Կանանց մեծամասնությունն արդեն ինքնասպանության փորձ անելուց հետո է դիմում մեզ: Նրանց համար իրենց կյանքը, նույնիսկ իրենց երեխաների ապագան ոչինչ չի արժենում»,- նշեց կենտրոնի հոգեբանը: Նրա խոսքով՝ սեռական բռնության դեպքերը ևս շատ են: Սակայն հայ կանայք այդ մասին չեն բարձրաձայնում: