«Ժողովուրդ». Քաղաքաշինության նորանշանակ նախարարը սեր ունի ոսկյա զարդերի և գեղանկարների նկատմամբ

Պարզվում է՝ ՀՀ քաղաքաշինության նորանշանակ նախարար, Վերահսկիչ պալատի նախկին աշխատակից Սամվել Թադևոսյանը սեր ունի ոսկյա զարդերի և գեղանկարների նկատմամբ: Նա 12 միլիոն դրամի գեղանկարների հավաքածու ունի, 30 միլիոն դրամի ադամանդե քարեր և ոսկյա զարդեր։

Բացի այդ, Երևանում 480.7 քմ մակերեսով բնակելի տուն ունի, մայրաքաղաքի մեկ այլ հասցեում՝ հողամաս, լողավազան, անավարտ կառույց, 74.8 քմ մակերեսով բնակարան: 2012–ի մարտի 1-ի դրությամբ վերջին մեկ տարվա կտրվածքով նախարարն ունեցել է 27 միլիոն 233 հազար դրամի եկամուտ, որից 5 միլիոն 233 հազար դրամը Վերահսկիչ պալատից ստացած աշխատավարձն է, իսկ 22 միլիոնը՝ գյուղմթերքների իրացումից ստացված եկամուտը:

Ըստ «Հետք»-ի՝ մարտի 1-ի դրությամբ նախարարի հաշվին եղել է 20 միլիոն դրամ, 20 հազար դոլար և 6 հազար եվրո»:

«ժողովուրդ»-ը ՀՀ քաղաքաշինության նորանշանակ նախարարից հետաքրքրվել է, թե որտեղից նրան այդքան գումար, եթե տարիներ շարունակ պետական պաշտոն է զբաղեցրել:

«Ձեր ներկայացրած տվյալները վերցված են եկամուտների հայտարարագրից, իսկ ինչպես գիտեք, այն հրապարակային փաստաթուղթ է, և Ձեր բոլոր հարցերի պատասխանը կարող եք գտնել այնտեղ, քանի որ Սամվել Թադևոսյանը՝ որպես պետական պաշտոնյա, եկամուտների հայտարարագիր է ներկայացրել ճիշտ այն թվականից, որ թվականից որ օրենքը գործողության մեջ է մտել»,- պատասխանել է քաղաքաշինության նախարարի մամլո խոսնակ Լուսինե Մարգարյանը' ըստ էության անպատասխան թողնելով հարցը: