Այն, ինչ կարելի է Սաշիկ Սարգսյանին՝ չի կարելի Հրայր Թովմասյանին

Վերլուծական 16 Հունվար, 2020 16:30

Երեկ անչափ ուշագրավ տեղեկություն տարածվեց, առ այն, որ 2019 թվականի դեկտեմբերի 13-ից դադարեցվել են «Մարջան Մայնինգ Քոմփանի» ՍՊԸ-ի՝ շահագործման հանքավայրը՝ ՀՀ Սյունիքի մարզ, Մարջանի ոսկի- բազմամետաղային հանքավայրի կենտրոնական տեղամաս և թևեր, «Մեգո Գոլդ» ՍՊԸ-ի` շահագործման հանքավայրը՝ ՀՀ Արագածոտնի մարզ, Թուխմանուկի ոսկու հանքավայրի կենտրոնական տեղամաս, և «Վայք Գոլդ» ՍՊԸ-ի՝ շահագործման հանքավայրը՝ ՀՀ Վայոց Ձորի մարզ, Ազատեկի ոսկի-բազմամետաղային հանքավայր ընդերքօգտագործման իրավունքները:

Իսկ ուշագրավն այս տեղեկության մեջ այն է, որ Մեգո Գոլդ ընկերությունը, ըստ մամուլում առկա հրապարակումների, կապվում է ՍԴ ներկայիս նախագահ Հրայր Թովմասյանի անվան հետ, իսկ մյուսը՝ «Վայք Գոլդ»-ը, ըստ նույն մամուլի, պատկանում է նախկին պատգամավոր, ՀՀԿ-ական Վարդան Այվազյանին: Ակնհայտ է, որ հանքերի դեմ պայքարը այս փուլում և այս տեսքով որոշակի քաղաքական պրեսինգի տարրեր է պարունակում, հատկապես, հաշվի առնելով ՍԴ շուրջ տեղի ունեցող զարգացումները:

Կառավարությունը և իշխող թիմը, կարծես, մոռացել են, որ պատրաստվում էին հանրության դատին ներկայացնել մի օրենք, որը հնարավորություն կընձեռեր բացահայտել հանքերի իրական սեփականատերերին: Ավելի ճիշտ՝ օրենքը հանրությանը հրամցրին, իհարկե, սակայն վերը նշված հնարավորությունը այնտեղ չֆիքսվեց: Փաշինյանն էլ իր հերթին մոռացել է, ինչպես էր 2016 թվականին ԱԺ ամբիոնից խոսում «Սաշիկի գործակցի» մասին, պնդելով, որ մեր երկրում չի գործում «Նասդաք»-ի գործակիցը, այլ առկա է միայն Սաշիկ Սարգսյանի «գործակից»: Մոռացել է, որ իր իսկ խոսքերով բազմաթիվ վարդենիսցիներ են իրեն մոտենում և բողոքում, որ Սաշիկը հանքը տանում է:

Արդյո՞ք այսօր ալևս որևէ մեկը չի բողոքում վարչապետ Փաշինյանին, արդյո՞ք Սաշիկի հանքերը այլևս արտոնյալ են, ինչպես, օրինակ, նախկին ՀՀԿ-ականներինը, կամ Սիլվա Համբարձումյանինը, ով հայտնի է իշխանահաճո ցուցմունքներ տալով: Այն, որ իշխանությունները չեն ցանկանում բացահայտել հանքերի իրական սեփականատերերին լավ չէ, նույնիսկ շատ վատ է, քանի որ խոսում է այն մասին, որ հեղափոխականները, կարծես թե, որոշակի համաձայնության են եկել «թալանչի» հանքատերերի հետ, իսկ մյուսների վրա, պարզապես, աչք են փակում, թե ինչու՝ իրենք կիմանան: Պարզապես, ստացվում է, որ այն, ինչ կարելի է Սաշիկ Սարգսյանին, չի կարելի Հրայր Թովմասյանին: