Մեծ Բրիտանիայի նախկին վարչապետը Քադաֆիի որդուն փորձել է ընդունել Օքսֆորդի համալսարան. "The Daily Mail"

Մեծ Բրիտանիայի նախկին վարչապետ Թոնի Բլեերն իր կառավարության օրոք փորձել է համոզել Օքսֆորդի համալսարանի ղեկավարությանը Լիբիայի նախկին առաջնորդ Մուամար Քադաֆիի որդուն՝ Սեյֆ ալ Իսլամին ընդունել Օքսֆորդի համալսարան։ Սակայն համալսարանի ղեկավարությունը մերժել է Բլեերին՝ պատճառաբանելով, որ Քադաֆիի որդին չունի բավարար ինտելեկտուալ մակարդակ՝ նման բարձրակարգ հաստատությունում սովորելու համար։ 

Այն փաստը, որ 2002 թվականին Մեծ Բրիտանիայի արտաքին գերատեսչության պաշտոնյաները փորձել են համոզել Օքսֆորդի համալսարանի ղեկավարությանը՝ Սեյֆ ալ Իսլամին Օքսֆորդի համալսարան ընդունելու համար, "The Daily Mail"–ի թղթակցին է հայտնել Օքսֆորդի համալսարանի Միջազգային հարաբերությունների բաժնի ղեկավար Վալֆի Ֆիթսջերալդը։ Ի պատասխան կառավարության բարձրաստիճան պաշտոնյաների միջնորդությանը` նա ասել է, որ Քադաֆիի որդին իր էությամբ չի համապատասխանում Օքսֆորդի ակադեմիական պահանջներին։ Այնուհետև Ֆիթսջերալդը թղթակցին հայտնել է, որ այդ պատասխանից հետո Քադաֆիի որդուն Օքսֆորդ ընդունելու որևէ միջնորդություն չի եղել։

Սակայն բրիտանական "The Guardian" պարբերականը հաղորդել է, որ, հատուկ հանձնաժողովի ստուգումների արդյունքում, բացահայտվել է, որ Լոնդոնի մեկ այլ բարձրակարգ կրթական հաստատության՝ Լոնդոնի տնտեսագիտական դպրոցի (The London School of Economics) ղեկավարությունը Սեյֆ ալ Իսլամից ստացել է 1.5 մլն ֆունտ սթերլինգ նվիրատվություն և չի անհանգստացել այդ գումարի անհայտ ծագմամբ։ Մինչդեռ ստուգող հանձնաժողովի անդամներն եկել են այն եզրակցության, որ այդ գումարները Քադաֆիի որդին տվել է որպես կաշառք։

Ստուգող հանձնաժողովը, որը գլխավորել է Անգլիայի և Ուելսի նախկին դատախազ Լորդ Վուլֆը, հայտնել է, որ իրենք եկել են այն եզրակացության, որ Սեյֆ ալ Իսլամի՝ Լոնդոնի տնտեսագիտական դպրոց ընդունվելու փաստը պայմանավորված է եղել Բրիտանական զենք արտադրողների, մասնավորապես՝ "BAE Systems" ընկերության շահերով։

Սեյֆ ալ Իսլամն այդ գումարը փոխանցել է 2008 թվականին, որից հետո պաշտպանել է գիտական ​​թեզ և ստացել Լոնդոնի տնտեսագիտական դպրոցի դոկտորի աստիճան։ Այս տարվա մարտին բացահայտվեց, որ Քադաֆիի որդու՝ «Քաղաքացիական հասարակության դերը ժողովրդավարացման և գլոբալ կառավարման ինստիտուտներում» (The Role of Civil Society in the Democratisation of Global Governance Institutions) պաշտպանած գիտական թեզը գրվել է այլ մարդկանց կողմից։ 

Այդ տեղեկություններից հետո Լոնդոնի տնտեսագիտական դպրոցի ղեկավար Հովարդ Դեվիսը հրաժարական տվեց՝ կրթական հաստատության վարկանիշը քցելու և Քադաֆիի ընտանիքի հետ կապեր ունենալու համար։