Սիրիական բանակը գրոհում է Հալեպի վրա

Սիրիական կառավարական բանակը այսօր առավոտյան անցավ Հալեպի լայնամասշտաբ գրոհի: Այդ մասին հաղորդում է «Ալ-Արաբիա» հեռուստաընկերությունը` հղելով սիրիական բանակում իր աղբյուրներին:

Սիրիայի պետական հեռուստաընկերույթունը հաղորդում է, որ գրոհի առաջին ժամերին կառավարական զորքերը հաջողություններ են ունեցել՝ զբաղեցնելով Հալեպի հարավի Սալահ էդ-Դին թաղամասը, որով անցնում է Հալեպը Դամասկոսի հետ կապող մայրուղին:

«Ալ-Ջազիրա» հեռուստաընկերությունը հաղորդում է, որ Սիրիայի ընդդիմության զինված թևը` «Սիրիական ազատ բանակը» հաստատում է, որ նահանջել է Սալահ էդ-Դին թաղամասից:

Որոշակիորեն տարբերվում են The Guardian և Reuters գործակալության տվյալները, համաձայն որոնց՝ ընդդիմադիրները չնչին նահանջ են արձանագրել և կառավարական զորքերի առաջընթացի մասին տեղեկությունները զգալիորեն չափազանցված են:

Նշենք, որ արդեն շուրջ 2 շաբաթ է, ինչ մարտեր են մղվում ռազմավարական նշանակություն ունեցող Սալահ էդ-Դին թաղամասի համար: Նախկինում արդեն հաղորդվել էր, որ կառավարական զորքերին հաջողվել է ետ վերցնել այն, սակայն հետագայում պարզվեց, որ այդ տեղեկությունը չի համապատասխանում իրականությանը:

Աղբյուրների փոխանցմամբ, թաղամասը բազմաթիվ անգամներ հրետանակոծվել ու ռմբակոծվել է կառավարական զորեքրի կողմից, ինչի հետևանքով Սալահ էդ-Դինում շենքերի շուրջ 60 տոկոսը արդեն քանդված է:

Հավելենք, որ Սալահ էդ-Դինը Հալեպի հարավում է և բավականին հեռու է քաղաքի հայաբնակ հատվածներից: