Նոր Հայաստանի «խնամի-ծանոթ-բարեկամ» շղթան

Վերլուծական 20 Հունվար, 2020 16:30

Նոր Հայաստանի «խնամի-ծանոթ-բարեկամ» շղթան

Վարչապետ Նիկոլ Փաշինյանը բազմիցս իր ուղիղ եթերների ընթացքում խոսում է իր տված խոստումների մասին և դրանք համարում կատարված: Նմանատիպ ուղիղ եթերի ընթացքում Փաշինյանն ասում էր, որ կա քաղաքացիական ծառայության մասին օրենք, և իրենք ամեն ինչ անում են, որ ամեն մի իշխանություն չգա ու իր բաջանաղին չմտցնի պետական կառավարման համակարգ, և ասում. «Հիմա հարց՝ էս խոստումը կատարվե՞լ է», և ինքն իրեն պատասխանում, որ «այո, լիարժեք` 100 տոկոսով կատարվել է»:

Սակայն արդյո՞ք դա այդպես է, մի պարագայում, երբ Նոր Հայաստանի պետական համակարգում վխտում են թավշյա պաշտոնյաների բարեկամները, խնամիները և ծանոթները: Օրինակ՝ Արարատի մարզպետը յուր բարեկամներին աշխատանքի տեղավորելու հարցում արդեն իսկ խփել է բոլոր հնարավոր և անհնար ռեկորդները: Գարիկ Սարգսյանը Արարատի մարզպետարանում աշխատանքի է ընդունել իր զարմիկին՝ Գևորգ Մանուկյանին, ում նշանակել է իր օգնականի պաշտոնում: Համընդհանուր խրախճանքից հետ չի մնացել նաև սոցապ նախարար Զարուհի Բաթոյանը: Մասնավորապես, նախարարը աշխատանքից ազատել է նախարարության աշխատակազմի ղեկավար Արտակ Գրիգորյանին, ու այդ պարտականություններն այժմ իր աշխատանքին զուգահեռ կատարում է նախարարության ֆինանսատնտեսագիտական և հաշվապահական հաշվառման վարչության պետ Ստեփան Մաչյանը: Եվ այստեղ ուշագրավն այն է, որ Մաչյանը Բաթոյանի քրոջ ամուսնու եղբայրն է՝ տագրը: Մամուլը բազմիցս է անրադարձել ՊԵԿ փոխնախագահ Ռաֆիկ Մաշադյանի բարեկամներին, ովքեր պարբերաբար յուղոտ պաշտոններ են ստանում: Մասնավորապես՝ վերջերս հրաման է ստորագրվել Ալբերտ Ալեքսանյանին ՊԵԿ կազմակերպման եւ հսկողության վարչության պետի տեղակալ նշանակելու մասին: Ալբերտ Ալեքսանյանը Ռաֆիկ Մաշադյանի եղբոր փեսան է: Մաշադյանի որդին էլ` 23-ամյա Հարություն Մաշադյանը նշանակվել է Երևանի կայազորի զինվորական դատախազ:

Ընկերասիրությամբ հասցրել է աչքի ընկնել Փաշինյանի ևս մեկ կադր՝ առողջապահության նախարար Արսեն Թորոսյանը: Հոգեկան առողջության պահպանման կենտրոնի նախկին տնօրեն Նարեկ Վանեսյանը, հիշեցնենք, հայտնի սկանդալից հետո հրաժեշտ տվեց պաշտոնին, իսկ այդ պաշտոնին վերջինս նշանակվել էր միայն այն պատճառով, որ հանդիսանում էր նախարար Թորոսյանի մտերիմ ընկերը:

Ինչպես տեսնում ենք ՀՀԿ բարքերը ՔՊ-ում շարունակվում են սրբորեն պատվել և պահպանել, չնայած այն հանգամանքին, որ թե՛ 2017-ի նախընտրական արշավների, թե՛ 2018-ի հեղափոխության օրերին, թե՛ դրանից հետո Նիկոլ Փաշինյանը մշտապես պնդել է, որ խնամի-ծանոթ-բարեկամ շղթան պետք է արմատախիլ անել , քանի որ հենց այդ շղթան է հարվածում երկրի զարգացմանը: Ինչևէ, առնվազն, այդ հարցում Փաշինյանը, միանշանակ, իրավացի էր…