Ուզբեկստանը ԵԱՏՄ-ում կբավարարվի դիտորդի կարգավիճակով. Շավկատ

Ուզբեկստանը դիտարկում է ԵԱՏՄ-ի հետ գործակցություն ծավալել ոչ թե լիարժեք անդամի, այլ դիտորդի կարգավիճակում։ Այս մասին հայտարարել է այդ երկրի նախագահ Շավկատ Միրզիեեւը, ըստ Kun.uz-ի։ «Մենք չենք անդամակցում միությանը որպես կազմակերպության անդամ։ Մենք պետք է նախ հասկանանք, թե արդյոք դա ընդունելի է մեզ համար ներկայիս իրավիճակում։ Դիտորդությունը անդամակցություն չէ։ Մենք պետք է պարզենք, թե ինչն է մեզ համար հարմար, ինչը ոչ»,- ասել է Միրզիեեւը։

Газета.uz-ն էլ մանրամասնում է, որ Միրզիեեւը անվանապես չի խոսել ԵԱՏՄ մասին, սակայն կոնտեքստից պարզ զգացվել է, որ խոսքը հենց Եվրասիական Միության մասին է։ Միրզիեեւը նաեւ ասել է, որ անցյալ տարեվերջին Պետերբուրգում տեղի ունեցած ԱՊՀ անդամ պետությունների ղեկավարների ոչ պաշտոնական հանդիպմանը նա այս հարցը քննարկել է իր ռուս պաշտոնակցի հետ։ Չմանրամասնելով թե կոնկրետ ինչ է խոսել Պուտինի հետ, Միրզիեեւը միայն ասել է, որ երբ ժամանակը գա ամեն բան կասի, ու միայն հավելել է, որ ամեն բան խոսել է Պուտինի հետ եւ պայմանավորվել են բոլոր հարցերի շուրջ, ապա ընդգծել է, որ բոլոր քայլերը, որ կատարում են հանուն ուզբեկ ժողովրդի է եւ ուզբեկական տնտեսության։