Փոխվարչապետն այցելեց Արարատի եւ Վայոց Ձորի մարզեր

ՀՀ փոխվարչապետ, տարածքային կառավարման նախարար Արմեն Գեւորգյանն այսօր այցելեց Արարատի եւ Վայոց ձորի մարզեր՝ առաջնահերթ խնդիրների լուծման երրորդ հրատապ ծրագրով իրականացվող շինաշխատանքների ընթացքին ծանոթանալու նպատակով:

Արարատի մարզին երրորդ հրատապ ծրագրով հատկացվել է 1 մլրդ 305 մլն դրամ, որով մարզում իրականացվում է 60 ծրագիր: Արդեն ավարտված է ընդհանուր աշխատանքների 50 տոկոսը:

Փոխվարչապետն Արարատի մարզպետ Էդիկ Բարսեղյանի ուղեկցությամբ այցելեց Ոսկետափ համայնք, որտեղ երրորդ հրատապ ծրագրով հատկացված 10 մլն դրամով վերանորոգվում է համայնքի բազմաբնակարան շենքի տանիքը:Աշխատանքների ավարտը նախատեսված է օգոստոսի վերջին:

Ավշար համայնքում Ա. Գեւորգյանը ծանոթացավ համայնքային մանկապարտեզում իրականացվող շինմոնտաժային աշխատանքների ընթացքին, որի համար երրորդ հրատապ ծրագրով հատկացվել է 25 մլն դրամ: Աշխատանքներն իրականացվում են սահմանված ժամկետներում եւ սեպտեմբերին մանկապարտեզը կունենա նորացված ենթակառուցվածքներ: Համայնքային մանկապարտեզի վերանորոգումը սկսվել է դեռեւս հրատապ երկրորդ ծրագրով, որի համար հատկացվել էր 10 մլն դրամ:

Փոխվարչապետը նշեց, որ աշխատանքները պետք է կատարվեն ըստ ժամանկացույցի եւ որակով , եւ հորդորեց մարզպետին մշտապես ուշադրություն դարձնել հրատապ ծրագրով մարզում իրականացվող շինաշխատանքների որակին:

Առաջնահերթ խնդիրների լուծման երկրորդ եւ երրորդ հրատապ ծրագրերի ֆինանսավորմամբ Արարատ քաղաքն ունի վերանորոգված մշակույթի տուն: Մշակույթի տան վերանորոգումը սկսվել եւ ավարտին է հասցվել առաջնահերթ խնդիրների լուծման երկրորդ եւ երրորդ հրատապ ծրագրերով հատկացված համապատասխանաբար 36 եւ 25 մլն դրամով:

Ա.Գեւորգյանը կարեւորեց համայնքներում վերանորոգված, բարվոք պայմաններով մշակույթի տների առկայությունը, ընդգծելով դրանց կարեւորությունը մարզերում երիտասարդների ժամանցի կազմակերպման առումով:

Ընդհանուր առմամբ Արարատի մարզին առաջնահերթ խնդիրների լուծման հրատապ երեք ծրագրերով հատկացվել է 3 մրդ 915 մլն դրամ: Իրականացվել է եւ շարունակվում է ենթակառուցվածքների, կրթական, մշակութային, համայնքային նշանակության կառույցների վերանորոգմանը, հիմնանորոգմանն ուղղված 185 ծրագիր մարզի 87 համայնքում: Կան համայնքներ, որտեղ աշխատանքները վերջնական ավարտելու համար երեք ծրագրով էլ աշխատանքներ են կատարվել:

Արարատի մարզից Ա.Գեւորգյանը մեկնեց Վայոց ձորի մարզ: Մարզպետ Էդգար Ղազարյանի ուղեկցությամբ Ռինդ գյուղում ծանոթացավ համայնքի կոյուղագծի շինարարության ընթացքին: Կոյուղագիծն անցկացվել է երկրորդ հրատապ ծրագրով հատկացված 25 մլն դրամով: Փոխվարչապետի հետ քննարկվեց համայնքում կոյուղաջրերի մաքրման կայանի կառուցման համար ֆինանսական աղբյուրների հնարավորությունները: Հաշվի առնելով դեղձի այս տարվա առատ բերքը, Ռինդ համայնքի ղեկավարը Ա. Գեւորգյանի մոտ բարձրացրեց դեղձի իրացման խնդիրը եւ մթերման կազմակերպման հարցում ակնկալեց կառավարության աջակցությունը:

Մարզի Մարտիրոս համայնքի երիտասարդական կենտրոնը վերանորոգվել է ՕՔՍՖԱՄ բարեգործական կազմակերպության աջակցությամբ, սակայն աշխատանքները կիասավարտ են մնացել: Համայնքում Ա. Գեւորգյանի մոտ բարձրացվեց երրորդ հրատապ ծրագրով տնտեսված գումարներից 2,4 մլն դրամն անավարտ աշխատանքների համար հատկացնելու հարցը: Համայնքի բնակիչները Ա.Գեւորգյանին ներկայացրին մի շարք խնդիրներ, նշելով, որ հատկապես առաջնահերթ են համայնքի վթարային բնակելի տների հարցի լուծումը, ինչպես նաեւ համայնքային մշակույթի տան վերանորոգումը:

Բարձրունի համայնքում փոխվարչապետը քննարկեց դպրոցի շենքի ամրացման աշխատանքների ընթացքը: Երրորդ հրատապ ծրագրով այս նպատակով հատկացվել է 10,5 մլն դրամ: Փոխվարչապետին զեկուցվեց, որ նախագծային աշխատանքներն ավարտված են, շուտով կմեկնարկեն շինաշխատանքները եւ կավարտվեն հոկտեմբերին:Համայնքի բնակիչները Ա. Գեւորգյանին դիմեցին ոռոգման ցանցի վերանորոգման հարցով, որը հնարավորություն կտա մշտապես ոռոգելի դարձնել եւ մշակել 100 հա գյուղատնտեսական նշանակության հող: Գյուղացիները բարձրացրին նաեւ Սերս-Բարձրունի ճանապարհի վերանորոգման խնդիրը եւ ակնկալեցին կառավարության աջակցությունը:

Վայոց ձորին առաջնահերթ խնդիրների լուծման հրատապ երեք ծրագրերով հատկացվել է 780 մլն դրամ: Ընդհանուր առմամբ՝ երեք ծրագրերով մարզի 16 համայնքներում իրականացվել եւ ընթացքի մեջ է 51 ծրագիր:

Այցի ավարտին փոխվարչապետը մարզպետարանում հրավիրված խորհրդակցության ընթացքում մարզպետարանի պատասխանատուների հետ քննարկեց մարզի առաջնահերթ խնդիրներին' սեփական եկամուտների հավաքագրմանը, գյուղատնտեսական բերքի իրացմանը, ոռոգման կազմակերպմանը վերաբերող հարցեր: